Reseide ótken «Aviadarts – 2019» baiqaýynda Qazaqstan komandasy ekinshi oryndy jeńip aldy. El namysyn Taldyqorǵandaǵy 21751 áskeri bóliminiń ushqyshtary qorǵady, dep habarlaidy QazAqparat.
Qazaqstannyń Reseidegi Elshiliginiń resmi saitynda málim etilgendei, joiǵysh ushaqtar arasyndaǵy synǵa túsken áýe qyrandarynyń bilimi men mashyǵy 3 kezeń boiynsha baǵalandy. Alǵashqysynda ekipaj músheleriniń fizikalyq daiyndyǵy saralandy. Iaǵni, mamandar kermege tartylyp, sýda júzgen. Budan keiin baiqaýǵa qatysýshylardy arnaiy dóńgelekte ainaldyryp, shydamdylyǵy tekserilgen.
Ekinshi kezeńde áýe kemesimen kókke kóterilip, jerdegi nysandy izdetken. Sońǵy synda qos ushaq qosarlasa ushyp, zeńgir kókte túrli jattyǵýlardy oryndady. Sondai-aq nysanany kózdep atý boiynsha óz sheberlikterin kórsetti.
«34 memleket ókili qatysqan bairaqty básekede ushqyshtar byltyrǵy nátijesin qaitalady. Áýe qorǵanysy kúshteriniń áleýetin pash etken sańlaqtar búgin SÝ 30 SM ushaǵymen Taldyqorǵanǵa keldi. Olardy basshylyq quram quttyqtap, óz rizashylyǵyn bildirdi», - delingen aqparatta.
«Bul ushqyshtardyń ǵana emes, búkil Qarýly Kúshterdiń jeke quramynyń jeńisi. Óitkeni, Aviadartsqa daiyndalý kezinde barlyǵy qatysty. Barlyǵy daiyndaldy. Osy oiyn arqyly búkil qatysqan elderge Qarýly Kúshterdiń kúshin, mártebesin dáleldedik dep oilaimyn», - dedi 21751 áskeri bóliminiń aǵa ushqyshy Nurjan Nurbaev.
«Aviadarts – 2019» baiqaýynda birinshi oryndy – Resei, ekinshi oryndy Belarýs komandasy jeńip aldy.
