QR Qorǵanys ministrliginiń arnaiy maqsattaǵy áskeri-meditsinalyq jasaǵy Beirýtke keldi dep habarlaidy "Ult aqparat" vedomstvonyń baspasóz qyzmetine silteme jasap.
Beirýt halyqaralyq áýejaiynda jasaqty Qazaqstan Respýblikasynyń Livan Respýblikasyndaǵy ýaqytsha senimdi ókili Erjan Qalekenov, Livan Respýblikasy Qorǵanys ministrliginiń ókili brigadalyq general Ábi Karam jáne Livan Syrtqy ister ministrliginiń ókili Áli Dirani qarsy aldy.
«Biz Livanǵa kómek kórsetýdegi Qazaqstannyń osy igi isin baǵalaimyz jáne QR Prezidenti Qasym-Jomart Toqaevqa, kórsetken kómegi men qoldaýy úshin shyn júrekten rizashylyǵymyzdy bildiremiz», - dedi Livan Syrtqy ister ministrliginiń ókili Áli Dirani.
Aita ketý kerek, sáýirde tótenshe jaǵdai kezinde elde koronavirýs infektsiiasynyń taralýyna bailanysty arnaiy maqsattaǵy áskeri-meditsinalyq jasaqtar quryldy. Olar jedel áreket etýge jáne Qarýly kúshter qolbasshylyǵynyń arnaiy mindetterin oryndaýǵa arnalǵan.
«Áskeri dárigerler elimizdiń túrli aimaqtarynda tapsyrmalardy oryndady jáne qazir el basshylyǵynyń tapsyrmasy boiynsha Livan halqyna meditsinalyq kómek kórsetý úshin attandy. Ártúrli jaǵdaida jumys isteý úshin arnaiy maqsattaǵy áskeri-meditsinalyq jasaqtyń personaly bitimgershilik daiyndyq baǵdarlamasy boiynsha aǵylshyn tilin oqytý kýrstarynan ótken», delingen habarlamada.
Esterińizge sala keteiik, 8 tamyz kúni tańerteń QR Prezidenti – QR Qarýly kúshteriniń Joǵarǵy Bas Qolbasshysynyń tapsyrmasy boiynsha porttaǵy jarylys saldarynan zardap shekkenderge meditsinalyq kómek kórsetý úshin quramynda 29 áskeri dáriger men 4 aýdarmashysy bar top Beirýtqa jiberilgen bolatyn.
