Ulttyq qaýipsizdik komiteti Qytaiǵa quramynda altyn keni bar ónimderdi kontrabandalyq jolmen shyǵaryp kelgen qylmystyq topty ustady, dep habarlady UQK baspasóz qyzmeti.
Kúdiktiler altyndy kendi Aqmola oblysynyń Stepnogorsk óńirinde ornalasqan ken orynynan zańsyz óndirgen.
"Shikizatty zerttep, qaita óńdeýge arnalǵan jasyryn zerthanalar joiyldy", - delingen habarlamada.
Quramynda altyny joǵary (tonnasyna 1 kilogramǵa deiin) ken ártúrli mineral (kvartsit, pirit jáne taǵy basqa) retinde jalǵan qujatpen Qazaqstannan shyǵarylǵan. Qylmyskerler ai saiyn shamamen 100 tonna altyndy shikizatty shetel asyrǵan.
"UQK júrgizgen arnaiy operatsiia barysynda transulttyq uiymdasqan top músheleri ustaldy. Olar 250 million teńge turatyn 106 tonnadan astam kontrabandalyq júktiń kezekti partiiasyn – eki vagon altyndy kendi shyǵarý kezinde qylmys ústinde qolǵa tústi", - dep habarlady ulttyq qaýipsizdik komitetiniń baspasóz qyzmeti.
20 maýsymda Almaty qalasynyń qylmystyq ister jónindegi mamandandyrylǵan aýdanaralyq soty barlyq 12 aiyptalýshyny QR Qylmystyq kodesiniń 234 (ekonomikalyq kontrabanda) jáne 264 (transulttyq uiymdasqan top, transulttyq qylmystyq uiym qurý, olarǵa basshylyq etý, sondai-aq olarǵa qatysý) baptary boiynsha kináli dep tanyp, uzaq merzimge bas bostandyǵynan aiyrýǵa sottady. Transulttyq uiymdasqan toptyń bir múshesi sot úkimin kútip otyr.
