Álemdik ekonomikadaǵy jahandyq turaqsyzdyq pen quldyraýǵa qaramastan Qazaqstannyń altyn-valiýta rezervi aitarlyqtai ósip, 2020 jyldyń qarashasynda 33, mlrd dollardy qurady.
Bul bir jyl burynǵy kórsetkishten 13,8 paiyzǵa joǵary, dep habarlaidy "Ult aqparat" Finprom.kz-ke silteme jasap.
Elimizdiń altyn-valiýta rezerviniń artýy altyn qorjynynyń ósimimen bailanysty. Ótken jyldyń dál osyndai kezeńimen salystyrǵanda kórsetkish 26,9 paiyzǵa artyp, aqshaǵa shaqqanda 23,2 mlrd dollardy qurady. 2015 jyldan beri elimizdiń rezervterindegi altyn úlesi turaqty artyp keledi. Osy jyldyń qazanynda altyn-valiýta rezervindegi onyń úlesi 69,1 paiyzǵa jetti.
Altyn úlesiniń aitarlyqtai ósimi elimizdiń Ulttyq bankiniń baǵaly metalldy jappai satyp alýy men qorjynyn ártaraptandyrýǵa bailanysty bolyp otyr. Koronavirýs pandemiiasy týyndatqan daǵdarys, sonymen qatar energiia resrýstary naryǵyndaǵy aiqynsyzdyq jaǵdaiynda altynǵa investitsiia salý barynsha ózekti bola túsýde.
Qazaqstan altyn qory boiynsha álemde 13-orynda tur. 2014 jyldyń 4-toqsanynda elimiz atalǵan reitingtiń 23-satysynda bolǵan edi. Sol jyldan bastap QR Ulttyq bankiniń altyn-valiýta qoryna osy baǵaly metaldy satyp alý qarqyndy júrgizilip, osy jyldyń qarashasynda onyń salmaǵy 383,3 tonnaǵa jetti.
QR Ulttyq banki 2014-2019 jyldary aralyǵynda ǵana 215,2 tonna altyn satyp aldy. Buǵan qosa, elimiz osy jyldyń 3-toqsanynda altyn satyp alýda álemniń TOP-5 eliniń qataryna kirdi.
