Janarmai quiý stantsiialary monopoliiaǵa qarsy vedomstvonyń dizel otynyna baǵany tómendetý jónindegi talaptaryn oryndady. Bul týraly Básekelestikti qorǵaý agenttigi habarlady.
Buǵan deiin mamyr aiynan bastap elimizdiń ońtústiginde dizel otynyna baǵanyń óskeni týraly habarlanǵan bolatyn.
Osy oraida, Qazaqstan Respýblikasy Básekelestikti qorǵaý jáne damytý agenttigi júrgizilgen taldaý qorytyndysy boiynsha dizel otyny baǵasynyń ósýi alypsatarlyq sipatqa ie ekenin anyqtady.
Osyǵan bailanysty, 19 AJQS-qa dizel otynyna baǵany tómendetý arqyly sóz bailasý belgilerin joiý qajettiligi týraly habarlama jiberildi.
Habarlamany oryndaý merzimi ony alǵan kúnnen bastap kúntizbelik 30 kúndi quraidy. Habarlamany oryndamaý monopoliiaǵa qarsy tergeý júrgizýge negiz bolady.
Bul habarlamalardy naryq sýbektileriniń kópshiligi merziminen buryn oryndady jáne baǵany tómendetýge daiyn ekendikterin habarlady.
Nur-Sultan, Almaty, Shymkent qalalary men Qyzylorda, Jambyl, Túrkistan, Almaty oblystarynda ár litr baǵasy 2-den 5 teńgege deiin tómendetildi.
Sonymen qatar, osy jyldyń 1 shildesinen bastap dizel otynyna aktsiz baǵasy tonnasyna 540 teńgeden 9 myń 300 teńgege deiin kóterilgenin atap ótý qajet, bul faktor keiin baǵaǵa áser etýi múmkin.
Baǵalyq sóz bailasýǵa jáne JJM baǵasynyń negizsiz ósýine jol bermeý máselesi Agenttiktiń turaqty baqylaýynda.
