Májiliste «Qazaqstan Respýblikasy men Birikken Arab Ámirlikteri arasyndaǵy sottalǵan adamdardy berý shartyn ratifikatsiialaý týraly» zań jobasy qaraldy, dep habarlaidy "Ult aqparat".
QR Bas prokýrorynyń orynbasary Bolat Dembaevtyń aitýynsha, Birikken Arab Ámirlikterinde Qazaqstannyń alty azamaty – bes er adam jáne bir áiel jazasyn ótep jatyr.
«Qazaqstannyń alty azamatynyń beseýi bir qylmystyq is boiynsha qamalǵan. Olar top qurý, abaisyzda kisi óltirý jáne tonaý boiynsha 15 jylǵa bas bostandyǵynan aiyrylǵan. Áielge kelsek, ol esirtki satqany úshin, shamamen bes keli psihotroptyq zattar satqany úshin ómir boiy bas bostandyǵynan aiyrylǵan», - dedi B. Dembaev Májilistiń jalpy otyrysynda.
Onyń aitýynsha, Qazaqstanda sottalǵan BAÁ azamattary joq. Osylaisha, elder arasynda ýaǵdalastyq ornasa, sottalǵandar jazasyn Qazaqstanda ótei alady.
«Arab Ámirlikterindegi jaza bizdiń sot taǵaiyndaǵan jazaǵa tolyq sáikes kelýi kerek. Eger bizde ólim jazasy nemese ómir boiy bas bostandyǵynan aiyrý qarastyrylmaǵan bolsa, onda biz sottalýshyny jazasyn óteý úshin qabyldai almaimyz», - dep túsindirdi B. Dembaev.
