QR Ekologiia, geologiia jáne tabiǵi resýrstar ministri Maǵzum Myrzaǵaliev IX Azamattyq forýmda Qazaqstannyń negizgi ekologiialyq máselelerin atady, dep habarlaidy QazAqparat.
«Memleket basshysy Qasym-Jomart Kemeluly Toqaev bastamashy bolǵan «Halyq únine qulaq asatyn memleket» tujyrymdamasy azamattar men memleket arasyndaǵy dialogty, ózara is-qimyl men yntymaqtastyqtyń negizin qalady. Osy baǵytta úkimettik emes uiymdar qoǵammen keri bailanysty qamtamasyz ete otyryp, azamattyq bastamalardy usynyp, memlekettiń naqty saiasatyn qalyptastyrýǵa belsendi aralasýda», - dedi ministr IX Azamattyq forýmda ótken kezdesýde.
Spiker tabiǵi resýrstardy saqtaý men uqypty paidalaný respýblika úshin asa mańyzdy mindetterdiń biri ekenin atap ótti.
«Elimizdiń ekologiialyq problemalary alýan túrli jáne olardy sheshý úshin keshendi tásil qajet. Negizgi ekologiialyq máselelerge toqtalsam, eń aldymen aýanyń lastanýy men óndiristik jáne turmystyq qaldyqtardy basqarýdyń tómen deńgeiin aitar edim. Úshinshiden, Qazaqstannyń túrli óńirlerinde qorshaǵan ortanyń lastanýy máselesi baiaǵydan bar», - deidi M. Myrzaǵaliev.
Ministrdiń aitýynsha, 10 qalada (Aqtóbe, Atyraý, Nur-Sultan, Almaty, Shymkent, Óskemen, Qaraǵandy, Temirtaý, Balqash, Jezqazǵan) aýa lastanýynyń eń joǵarǵy deńgeii tirkelgen.
«Emissiialardyń jalpy kólemi 2,5 mln tonnany qurasa, sonyń 56% - Qaraǵandy men Pavlodar oblystaryna tiesili», - dedi M. Myrzaǵaliev.
