قر ەكولوگييا, گەولوگييا جەنە تابيعي رەسۋرستار مينيسترٸ ماعزۇم مىرزاعاليەۆ IX ازاماتتىق فورۋمدا قازاقستاننىڭ نەگٸزگٸ ەكولوگييالىق مەسەلەلەرٸن اتادى, دەپ حابارلايدى قازاقپارات.
«مەملەكەت باسشىسى قاسىم-جومارت كەمەلۇلى توقاەۆ باستاماشى بولعان «حالىق ٷنٸنە قۇلاق اساتىن مەملەكەت» تۇجىرىمداماسى ازاماتتار مەن مەملەكەت اراسىنداعى ديالوگتى, ٶزارا ٸس-قيمىل مەن ىنتىماقتاستىقتىڭ نەگٸزٸن قالادى. وسى باعىتتا ٷكٸمەتتٸك ەمەس ۇيىمدار قوعاممەن كەرٸ بايلانىستى قامتاماسىز ەتە وتىرىپ, ازاماتتىق باستامالاردى ۇسىنىپ, مەملەكەتتٸڭ ناقتى ساياساتىن قالىپتاستىرۋعا بەلسەندٸ ارالاسۋدا», - دەدٸ مينيستر IX ازاماتتىق فورۋمدا ٶتكەن كەزدەسۋدە.
سپيكەر تابيعي رەسۋرستاردى ساقتاۋ مەن ۇقىپتى پايدالانۋ رەسپۋبليكا ٷشٸن اسا ماڭىزدى مٸندەتتەردٸڭ بٸرٸ ەكەنٸن اتاپ ٶتتٸ.
«ەلٸمٸزدٸڭ ەكولوگييالىق پروبلەمالارى الۋان تٷرلٸ جەنە ولاردى شەشۋ ٷشٸن كەشەندٸ تەسٸل قاجەت. نەگٸزگٸ ەكولوگييالىق مەسەلەلەرگە توقتالسام, ەڭ الدىمەن اۋانىڭ لاستانۋى مەن ٶندٸرٸستٸك جەنە تۇرمىستىق قالدىقتاردى باسقارۋدىڭ تٶمەن دەڭگەيٸن ايتار ەدٸم. ٷشٸنشٸدەن, قازاقستاننىڭ تٷرلٸ ٶڭٸرلەرٸندە قورشاعان ورتانىڭ لاستانۋى مەسەلەسٸ باياعىدان بار», - دەيدٸ م. مىرزاعاليەۆ.
مينيستردٸڭ ايتۋىنشا, 10 قالادا (اقتٶبە, اتىراۋ, نۇر-سۇلتان, الماتى, شىمكەنت, ٶسكەمەن, قاراعاندى, تەمٸرتاۋ, بالقاش, جەزقازعان) اۋا لاستانۋىنىڭ ەڭ جوعارعى دەڭگەيٸ تٸركەلگەن.
«ەميسسييالاردىڭ جالپى كٶلەمٸ 2,5 ملن توننانى قۇراسا, سونىڭ 56% - قاراعاندى مەن پاۆلودار وبلىستارىنا تيەسٸلٸ», - دەدٸ م. مىرزاعاليەۆ.
