Búgin Ýkrainanyń Qazaqstandaǵy elshiliginde «EXPO - 2017: Ýkraina Astanaǵa ne ákeledi?» taqyrybynda brifing ótti. Onda Qazaqstan Respýblikasyndaǵy Ýkraina isteriniń ýaqytsha senimdi ókili Volodymyr Djidjora aitýly sharadaǵy ýkraindyq taraptyń josparlarymen bólisti.
Senimdi ókildiń málimdeýinshe, Qazaqstan Ýkraina jáne ondaǵan memleketke pavilonǵa tegin ornalasýǵa múmkindik berdi. Bul memleketter arasyndaǵy kelissózder nátijesinde júzege asqan. «EKSPO-2017» kórmesine daiyndyq jumystarymen Ýkrainanyń Ekonomikalyq damý jáne saýda ministrligi jáne Ýkrainanyń saýda-ónerkásiptik palatasy ainalysýda. Sonymen birge, Ýkrainanyń vitse-premeri Gennadii Zýbko Ýkraina sektsiiasynyń komissary bolyp taǵaiyndalǵan.
Ýkraina pavilonynyń aýmaǵy 35 sharshy metrdi quraidy. Munda úlken ekran ornatylyp, Ýkrainanyń bar múmkindikteri media-tanystyrylym túrinde kórsetiledi. Búginge deiin Ýkrainanyń ondaǵan kompaniialary kórmege qatysatyndaryn rastady. Olardyń qatarynda DTEK, «Fýrlender Vindtehnolodji», «Syneko» jáne «SolarGaps» bar. Bul Ýkrainadaǵy balamaly energiia óndirý boiynsha aldyńǵy qatarly jeke kompaniialar. Kórme barysynda elektr energiiasyn óndirý, taratý jáne saqtaýmen ainalysatyn ýkrainalyq kompaniia ókilderi óz áleýetterin kórsetip, seriktestermen kelissózder júrgize alady.
«Ýkrainada jel elektr óndirisi jaqsy damyǵan. Sondyqtan , biz jel jáne kún energiiasyna qatysty qyzyqty tehnologiialarmen bólise alamyz. Men Qazaqstannyń Qaraǵandy, Aqtaý, Pavlodar syndy qalalarynda boldym jáne Qazaqstannyń basym bóliginde jeldiń óte kóp ekenin baiqadym. Sondyqtan, Qazaqstanǵa jel qýatyn óndirýdi damyta túsý qajet», - dep tolyqtyrdy V.Djidjora.
15 maýsym kúni EKSPO aýmaǵynda Ýkrainanyń ulttyq kúni ótedi. Oǵan Qazaqstan halqy Assambleiasy aiasynda jumys isteitin ýkrain etnomádeni birlestikteri, Astanadaǵy ýkraindyq meiramxanalar atsalysady. Ulttyq kúnge Ýkraina premer-ministri Vladimir Groisman arnaiy keledi dep kútilýde. Ulttyq kúnmen birge, premer-ministr eki eldiń kásipkerlerine arnalǵan biznes-seminarǵa da qatysady. Seminarǵa jańartylǵan energetika salasy boiynsha ýkraindyq jáne qazaqstandyq kásipkerler shaqyrylyp, yntymaqtastyq ornatý, kelissózder júrgizý múmkindigi beriledi.
EKSPO qarsańynda Ýkrainadan keletin jáne osy el arqyly ushyp keletin qonaqtardyń sany kóbeiedi. Osyǵan orai, Qazaqstan men Ýkraina arasyndaǵy áýe reisteriniń sany ulǵaiady. Odan bólek, «Eir Astana» áýe kompaniiasymen Kiev-Astana baǵytynda tikelei reis ashý týraly kelissózder aiaqtalýǵa jaqyn. Kórme kezinde «Ýkraina halyqaralyq áýe jelileri» jáne «Eir Astana» kompaniialarynyń reisteri aptasyna 7 jáne 5 kún ushady dep josparlanyp otyr.
Eske sala ketsek, 2017 jyldyń 23 aqpanynda EKSPO-2017 kórmesiniń komissary Rápil Joshybaev Ýkraina sektsiiasy komissarynyń orynbasary Sergei Savchýkpen kezdesken edi. Kezdesý qorytyndysy boiynsha Joshybaev pen Savchýk EKSPO-2017 halyqaralyq mamandandyrylǵan kórmesine Ýkrainanyń qatysatyny týraly shartqa qol qoidy.
