Qazaqstanǵa munai óndirý zaýyty qajet emes. Energetika ministrligi men «QazMunaiGaz» kompaniiasy Qazaqstan men sheteldik naryqqa taldaý jumystaryn júrgizip, osyndai qorytyndyǵa kelip otyr, dep habarlaidy "Ult aqparat".
«Qazaqstanǵa tórtinshi munai óńdeý zaýyty kerek pe, joq pa degen suraqtyń ainalasyndaǵy pikirtalastyń bárine núkte qoiý úshin biz «QazMunaiGazben» birge byltyr tereń taldaý jumystaryn júrgizgen bolatynbyz. «QazMunaiGaz» tipti naryqty, múmkindikter men trendterdi zertteýge qaýqarly kompaniialardy jaldap, belgili bir shyǵyndy da shyǵarǵany bar. Trendter demekshi, qazirdiń ózinde álemde elektromobilderge degen qyzyǵýshylyqtyń artyp kele jatqanyn da eskerýge tyrystyq. Osyǵan bailanysty, munai ónimderin tutyný kóleminiń balansyn qaita zerdeledik. Aqyry, dál qazirgi ýaqytta tórtinshi munai óńdeý zaýytyn salýdyń qajeti joq degen qorytyndyǵa keldik», - dedi Qanat Bozymbaev OKQ-da ótken baspasóz máslihatynda.
Ministrdiń aitýyna qaraǵanda, Qazaqstanda qazirgi tańda úsh birdei MÓZ bar. Onyń ózi búgingi tańda tolyq qýatynda jumys istemei tur.
«Oǵan ónimniń keide artyq shyǵarylyp ketetinin qosa berińiz. Batys Qazaqstandaǵy MÓZ máselen, jalpy qýatynyń 50 paiyzy ǵana jumys atqarýda. Jobalyq sipaty jaǵynan artyq óndiriletini kózdelgenimen, ishki naryqtaǵy tómen baǵaǵa bailanysty bul zaýyt kondensatty álemdik naryqtyq baǵaǵa sai satyp ala almaidy», - dedi ol.
Ministrdiń paiymynsha, ishki naryqtyń kózqarasymen qaraityn bolsaq, Qazaqstanǵa tórtinshi MÓZ-diń qajeti joq.
«Al munai ónimderin eksporttaý kózqarasymen qarasaq, «munai ónimin satý tiimdi me, álde shikizatty satqan yńǵaily ma?» degen suraqqa jaýap izdeý kerek. Ókinishke qarai, Qazaqstan - alys kontinentaldy memleket. Al munaidy álemdik naryqta qubyr jelileri arqyly jetkizý yńǵailyraq. Álemdik naryqtaǵy baǵaǵa qol jetkizý úshin benzinimizdi Qara teńizdiń portyna jetkizýimiz kerek. Ol úshin jol boiy RF men Ýkraina temir joly úshin aqsha tóleý kerek bolady. Álbette, ónimimizdi satýǵa tolyqqandy bolary daýsyz! Sebebi, onyń sapasy eýrostandarttarǵa sai keledi. Alaida bul jolmen júrse kóliktik shyǵyndarymen birge munaishy shikizatty satýdan da az paida tabady. Sol úshin eksporttyq maqsat úshin MÓZ salyp, ónimdi alysqa eksportqa jiberemiz deý - óz-ózimizdi aldanǵanmen birdei bolar edi. Kásibi mamandardyń zertteýine súiengen jón. «QazMunaiGaz» kompaniiasymen júrgizgen taldaý jumystarynyń nátijesin biz sizdermen bólisýge daiynbyz», - dedi ministr.
