QR Ekologiia, geologiia jáne tabiǵi resýrstar ministri Serikqali Brekeshev Úkimet otyrysynan keiin ótken baspasóz máslihatynda Qyrǵyzstan tarapynan keletin sýdyń kólemi ózgermeitinin atady, dep habarlaidy QazAqparat.
«Qyrǵyz tarapynyń depýtattary shekaradaǵy saýda qatynasy rettelmese, Qazaqstanǵa tiesili sýdy qysý kerek degen másele kótergeni aitylyp júr. Shynymen de sondai táýekel bar ma», - dep surady BAQ ókili ministrden.
Vedomstvo basshysynyń aitýynsha, resmi deńgeide ondai másele kún tártibine qoiylyp otyrǵan joq.
«Qyrǵyz Respbýlikasyna sý resýrstary boiynsha qanshalyqty táýeldimiz degenge kelsek, rasymen táýeldilik bar. Negizinen Qyrǵyzstan aýmaǵyndaǵy Toqtaǵul sý qoimasynan keletin sýǵa táýeldimiz. Qyrǵyzdarmen arada kelisim bar. Olardyń bizge bólýi tiis sý kólemderi boiynsha eshqandai táýekel nemese qaýip kórip turǵan joqpyz. Qyrǵyzdar bizge sý bermei qoiady degen málimet bizde joq», - dedi ol.
Sondai-aq, ministr osy aidyń 20-sy kúni Taraz qalasynda Shý jáne Talas ózenderiniń boiyndaǵy sý sharýashylyǵy nysandary boiynsha májilis ótkenin eske saldy.
«Bul ózenderge Jambyl oblysynyń sýmen qamtamasyz etýli máselesi táýeldi. Ol jerde bizdiń mamandar qyrǵyz áriptesterimen kezdesti. Naqty kelisimder bar. Sondyqtan biz qyrǵyz tarapynan tiesili sýdy almai qalýymyz múmkin degen táýekel joq», - dedi Serikqali Brekeshev.
