Qazaqstanǵa krematorii qurylysy ne úshin qajet boldy? Bul suraqqa Ádilet ministrliginiń sarapshylyq jumysyn uiymdastyrý departamente qarasty Sot saraptamalary ortalyǵynyń jumysyn baqylaý basqarmasynyń basshysy Temirbolat Qojamjarov jaýap berdi, dep habarlaidy QazAqparat.
«Pandemiianyń sharyqtaý shegi kezinde COVID-19 indetinen kóz jumǵan azamattardyń sany kúrt ósip ketti. Aýrýhanalardyń patologo-anatomiialyq biýrosy men sot-meditsinalyq morgtarǵa adamdardyń denesi kóp jetkizilip, ondaǵy qyzmetkerler júktemeni eńsere almai jatty. Al bul jaǵdai halyqtyń ashýyn týǵyzdy. Sonymen qatar kisilerdiń denesin patologo-anatomiialyq jáne sot-meditsinalyq ashý kezinde meditsinalyq maska, kostiým, paket, bint, shprits sekildi qaýipti zattar kóbeiip ketti», - dep túsindirdi Temirbolat Qojamjarov.
Onyń aitýynsha mundai jaǵdaida qaýipti zattardy joiýdyń birden bir amaly – arnaiy peshterde órteý. Ólimniń burynǵydan kóbirek tirkelip, qaýipti zattardyń artýy Nur-Sultan jáne Almaty qalalarynda asa qaýipti biologiialyq qaldyqtardy joiýǵa arnalǵan joǵary tehnologiialy peshteri bar patologo-anatomiialyq biýrolardy salýǵa májbúrlegen.
«Qazaqstanda ómirden ótip ketken shetel azamattaryn jerleýge qatysty da problema týyndady. 2019 jyly qaitys bolǵan 50 sheteldik azamattyń denesi tekserilse (aǵzasyn ashý arqyly zertteý), ótip ketken jyly 200 azamatty osylai tekserýge týra keldi. Shekaralar jabylyp, otanyna qaitarý múmkin bolmaǵandyqtan, olardyń týǵan-týystary morgtarǵa júginip, krematsiia jasatýǵa ótinish bildirdi. Patologo-anatomiialyq biýrolar asa qaýipti virýstan nemese koronavirýstan kóz jumǵan bizdiń azamattardyń denesin krematsiialaýdy kózdemeidi. QR Densaýlyq saqtaý ministri 2018 jylǵy 18 jeltoqsanda bekitken №40 buiryǵynyń 239-erejesiniń 4-bóliginde kórsetilgendei, adamnyń denesi tek týǵan-týystarynyń kelisimi boiynsha krematsiialanady. Krematsiiadan keiin kúli týystaryna beriledi. Osy maqsatta Ádilet ministrligine joǵary tehnologiialy peshteri bar patologo- anatomiialyq biýrolardy salý úshin Nur-Sultan qalasyna arnalyp 1 mlrd 475 mln teńge, al Almaty qalasyn arnalyp 1 mlrd 744 mln teńge bólindi», - dep qosty Temirbolat Qojamjarov.
