Almaty men Astana qalalary arqyly keletin QHR azamattary úshin 72 saǵattyq tranzit rejimi jyl sońyna deiin uzartyldy. Bul týraly búgin QR mádeniet jáne sport ministri Arystanbek Muhamediuly málimdedi, dep habarlaidy Sputnik Qazaqstan tilshisi.
"Vizalyq-kóshi-qon rejimi salasynda aitarlyqtai oń ózgerister boldy. Almaty men Astana qalalary arqyly keletin QHR azamattary úshin 72 saǵattyq tranzittiń vizasyz rejimi 2018 jyldyń sońyna deiin uzartyldy. "EKSPO" halyqaralyq kórmesi kezinde bul pilottyq joba óz tiimdiligi men qaýipsizdigin kórsetti. 3 ai ishinde Qytaidan Qazaqstanǵa 4,5 myń týrist kelip, el ekonomikasyna árbiri 250-300 dollar qaldyrdy", — dedi Muhamediuly.
Ministr Qazaqstanǵa "72 saǵattyq vizasyz tranzit" jobasy ne beretinin túsindirdi.
"Qazir jurttyń kóbinde Qytaidan kelgen azamattar Qazaqstanda qalyp qoimai ma degen oi týady. Olai emes. Eń aldymen, Qytai azamaty Qazaqstanǵa kirý úshin bizdiń el arqyly odan ári qai memleketke ushatyny kórsetilgen aviabiletin usynýy tiis. Eger ushaq bileti bolmasa, onda árine elge kirgizilmeidi. Tranzit degenimiz osy. Qazaqstan Eýraziianyń tap ortasynda, óte qolaily jerde ornalasqan. Qytaidaǵy azamat Eýropaǵa, odan ári Amerikaǵa ushý úshin Qazaqstan arqyly saparyn jalǵastyrǵysy keledi. Biz de shetelge shyqqanda Ystanbul, Frankfýrt qalalary arqyly ushamyz ǵoi. Qazaqstan áýejailaryn nege olai damytpasqa?! Máselen, Ystanbul áýejaiy Túrkiia biýdjetiniń úshten birin beredi. Bizdiń maqsatymyz osy arqyly Qazaqstan ekonomikasyn kóterý, sonda áýejailar da dami bastaidy", — dep túiindedi Muhamediuly.
