Qazaqstanǵa álemniń 15-ten astam eli koronavirýspen kúres úshin gýmanitarlyq júk jiberdi. Bul týraly Ortalyq kommýnikatsiialar qyzmetindegi brifingte QR Syrtqy ister ministriniń orynbasary Erjan Ashyqbaev aitty, dep habarlaidy "Ult aqparat".
«Syrtqy ister ministrligi Densaýlyq saqtaý ministrligimen birlesip, indet taraǵan kezden bastap syrtqy halyqaralyq áriptesterimizden tiisti qaiyrymdylyq kómekti elge jetkizý jumystaryn júrgizip keledi. Bul jumys óte aýqymdy. Árine, osy oraida eń aldymen áriptesterimiz - QHR, AQSh, Resei, BAÁ, Japoniia, Túrkiia, Ońtústik Koreia, Katar, Ózbekstan jáne kóptegen basqa da elderge, DSU siiaqty halyqaralyq uiymdarǵa, kompaniialarǵa, sheteldik qaiyrymdylyq qorlaryna, jekelegen azamattarǵa elimizge jasaǵan qaiyrymdylyq kómekteri úshin shynaiy rizashylyǵymyzdy jetkizgim keledi», - degen Erjan Ashyqbaev elimizge gýmanitarlyq kómek kórsetken 15-ten astam memleket bar ekendigin naqtylai tústi.
Osy rette QR SIM orynbasary gýmanitarlyq kómekke bailanysty birneshe faktorlarǵa erekshe toqtalyp ótti.
«Birinshiden, indet jahandyq bolǵannan keiin biz jumysymyzdy, iaǵni, dári-dármek satyp alý nemese shetelden qajetti meditsinalyq qurylǵylardy, zattardy ákelý máselesin dúniejúzindegi úlken básekelestik jaǵdaiynda iske asyryp jatyrmyz. Sondyqtan muny eskergen jón. Ekinshiden, gýmanitarlyq kómek qanshalyqty aýqymdy bolsa da, eń aldymen eń úlken júk Úkimetimizge, respýblikalyq biýdjetke túsip otyr. Biraq, eń úlken jaýapkershiligi júgi Densaýlyq saqtaý ministrligine, densaýlyq saqtaý júiesindegi áriptesterimizge túsip otyrǵany anyq», - dedi ol.
Onyń dereginshe, elimizge gýmanitarlyq júk retinde 5 mln 200 myńǵa jýyq meditsinalyq maska, 98 ókpeni jasandy jeldetý apparaty, 260 myń test júiesi, 3000 myńǵa jýyq teplovizor men termometr ákelindi.
