Kórneki sýret: pixabay.com
Ulttyq statistika biýrosynyń deregine sáikes, 2024 jyldyń qańtar-maýsym aralyǵynda elimizge 566,5 myń sheteldik týrist saiahattaǵan. Bul 2023 jylǵy sáikes kezeńmen salystyrǵanda 50,7 myń adamǵa kóp. 2023 jyldyń alǵashqy jartyjyldyǵynda Qazaqstanǵa 515,8 myń sheteldik týrist kelgen. Bul týraly QR Týrizm jáne sport ministrliginiń baspasóz qyzmeti málim etti, dep habarlaidy Almaty.tv.
Statistikaǵa sáikes, elimizge keletin sheteldik týristerdiń geografiiasy jyl saiyn keńeiip keledi. Mysaly, jaqyn kórshilerden bólek, Qazaqstanǵa muhittyń arǵy betindegi memleketterden de saiahatshylar kele bastady. Osy oraida, nazarlaryńyzǵa 2024 jyldyń birinshi jartyjyldyǵynda elimizge kelgen týrister sany boiynsha TOP-5 eldi usynamyz.
2024 jyldyń alǵashqy 6 aiynda elimizge eń kóp saiahatshy Resei Federatsiiasynan kelgen. Byltyrǵy qańtar-maýsym aralyǵynda Qazaqstanǵa 186,1 myń reseilik saiahattaǵan. Ekinshi oryndy Qytai týristeri ielendi. Shyǵystaǵy kórshimizden elimizge 69 918 adamnyń tabany tigen. Al úshinshi satyǵa Úndistan (53 695 adam) jaiǵasty. Sondai-aq úzdik bestiktiń qatarynda Túrkiia (30 312) jáne AQSh (19 597) elderi bar.
"Elimizge Úndistan, Túrkiia jáne AQSh siiaqty elderden keletin týrister sanynyń artýy Qazaqstannyń álemdik týristik kartada jyl ótken saiyn tartymdy baǵytqa ainalyp jatqanyn kórsetedi. Biz týristik infraqurylymdy damytýdy jáne álemniń túkpir-túkpirinen kelgen saiahatshylar úshin qolaily jaǵdai jasaýdy jalǵastyramyz", - dedi Týrizm indýstriiasy komitetiniń tóraǵasy Nurtas Káripbaev.
