Ázerbaijannan internet jelisin tartý jobasy jandanady. Qazirgi kezde kelissózder bastaldy. Bul týraly Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málimdedi, dep habarlaidy Sputnik Qazaqstan.
Májilistiń búgingi otyrysynda depýtat Aibek Paiaev sanktsiialyq soǵysqa qatysty taǵy bir máseleni kóterdi.
"Eger Reseiden bizge keletin trafik qiyndaǵan jaǵdaida Ázerbaijannan optikalyq-talshyqty jeli tartyp, internetti halyqqa qoljetimdi ete alamyz ba? Sosyn ony tranzitpen satyp, paida tabý jospary bar ma? Óitkeni ózińiz bilesiz, qazir elimizde internet qymbat, halyqqa qoljetimdi emes. Aýyldardy aralaimyz, internet joq! Sizder internet bar dep baiandaisyzdar, biraq ol joq. Al Ázerbaijannan trafik tartsaq, kóp máseleni sheshe alamyz", - dedi Paiaev.
Ministr Mýsinniń aitýynsha, Kaspii teńizi arqyly Ázerbaijannan talshyqty-optikalyq jeli tartý máselesi tórt jyl buryn qarastyrylǵan. Biraq iske aspai qaldy.
"Biyl osy joba jandanyp, iske asyrylady dep oilaimyn. Biz qazir Ázerbaijanmen kelissóz júrgizip jatyrmyz", - dep atap ótti Mýsin.
Buǵan deiin Qazaqstan tarapynan osy jobaǵa Transtelekom jaýapty bolǵan. Endi Qazaqtelekom ainalysady. Biraq memleketaralyq kelisimshartta Transtelekom kórsetilgen. Ony basqa qujattardyń negizinde aýystyrady.
"Biz tez arada osyny júzege asyramyz. Sebebi bul, shynymen de, strategiialyq mańyzy bar joba, memleket basshysynyń jeke baqylaýynda. Biz osy jobany bir jarym-eki jyldyń ishinde júzege asyramyz ", - deidi Mýsin.
Al depýtat Paiaev bul bastamany uzaqqa sozbaýdy surady. Depýtattar qajetti zańdardy jyldam qabyldaýǵa daiyn.
