Májilis depýtaty Aidos Sarym Resei syrtqy ister ministrliginiń resmi ókili Mariia Zaharovanyń Qazaqstanǵa shúilikkenine qatysty pikirin bólisti, dep habarlaidy Ulysmedia.kz.
Sarymnyń aitýynsha, Zaharova bul jaǵdaidy paidalanǵysy kelgen.
«Shyn máninde, Qazaqstanǵa eshqandai qysym joq. Menińshe, ýkrainalyq elshi - óte kásibi diplomat. Ol óz málimdemesinde qatelik ketkenin túsindi. Sol sebepti, keńes alý úshin eki ai buryn eline ketti. Ýkrainanyń Syrtqy ister ministrligi de bul jaǵdaidy óte jaqsy biledi. Sondyqtan elimizde Ýkrainanyń jańa elshisi taǵaiyndalmaq.
Bul Ýkrainamen qatynasymyzǵa eshqandai keri áserin tigizbeidi. Barlyq suraqtar sheshildi. Menińshe, Zaharova Ýkrainaǵa qysym kórsetý úshin osy jaǵdaidy paidalanǵysy keldi. Basqa eshteńe de joq», - dedi Májilis kýlýarynda jýrnalister suraǵyna jaýap bergen depýtat.
Eske sala keteiik, Ýkraina elshisi Petr Vrýblevskii Qazaqstannan ketetin boldy.
QR Syrtqy ister ministrliginiń resmi ókili Aibek Smadiiarov búgin Májilis kýlýarynda Ýkrainanyń syrtqy ister ministrligi jańa elshi taǵaiyndaý týraly ótinish jibergenin málim etti. Olardyń ótinishi qarastyrylyp jatyr.
“Biz Mariia Zaharovanyń (RF SIM resmi ókili) sózine túsinbeýshilikpen qaraimyz. Óitkeni onyń aitqan sózderi Qazaqstan men Resei arasyndaǵy seriktestik sipattaǵy qatynastarǵa qaishy keledi”, – dedi Aibek Smadiiarov.
Aita ketelik, Petr Vrýblevskiidiń qazaqstandyq blogerge berilgen suhbaty úlken daý týdyrǵan bolatyn. Suhbat barysynda Ýkraina elshisi reseilikterdi meiilinshe kóbirek óltirýge shaqyrǵan.
