Ranking.kz aqparat kózi Qazaqstanǵa investitsiia salatyn memleketterdiń ondyǵyn usyndy. Ulttyq banktiń málimetin negizge alǵan aqparat kózi sonymen qatar 2020 jyly Qazaqstanǵa eki myńnan astam jańa sheteldik kompaniia kirgenin jariia etti, dep habarlaidy "Ult aqparat".
«2020 jyldyń birinshi jartyjyldyǵynda koronavirýs pandemiiasynyń ekonomikalyq áserine bailanysty álemde tikelei sheteldik investitsiialar (TShI) 2019 jyldyń birinshi jartysymen salystyrǵanda 49%-ǵa tómendedi. Tikelei sheteldik investitsiialardyń barlyq negizgi túri qyqsarǵanyn atap ótý kerek. Dúnie júzi boiynsha enizilgen shekteý sharalary qoldanystaǵy investitsiialyq jobalardyń jumysyn tejedi, al aýqymdy retsessiia transulttyq korporatsiialarǵa jańa jobalardy qaita qaraýǵa májbúr etti. Quldyraýdyń eń úlken deńgeii damyǵan elderde baiqaldy, onda sheteldik tikelei investitsiialar aǵyny 75%-ǵa tómendedi. Óz kezeginde damýshy elderde investitsiialar aǵyny 12%-ǵa ǵana azaiǵan. Jalpy 2020 jyly TShI-diń jahandyq aǵyndarynyń tómendeýi 30-40% aralyǵynda bolatyny boljanýda», - delingen zertteýde.
Daǵdarystyń jaǵymsyz saldary Qazaqstandy ainalyp ótken joq.
Obektivti sebepterge bailanysty 2020 jyldyń 9 aiynda Qazaqstanǵa sheteldik tikelei investitsiianyń jalpy aǵyny bir jyl ishinde 32,2% tómendep, 12,6 mlrd AQSh dollaryn quraǵan.
Qysqarý kórsetkishi negizinen ekonomikanyń taý-ken sektoryna sheteldik investitsiia aǵynynyń negizgi bóligin quraityn TShI aǵyndarynyń tómendeýine bailanysty bolyp otyr.
Bul salada TShI aǵyny 42,1%-ǵa nemese 4,5 mlrd AQSh dollaryna azaiǵan.
«Álemdik daǵdarysqa qaramastan, Qazaqstan sheteldik investitsiialar úshin tartymdy el bolyp otyr. Aimaqtaǵy sheteldik investitsiialar aǵyny boiynsha sózsiz kóshbasshy. Táýelsizdik jyldary ishinde Qazaqstanǵa TShI aǵyny shamamen 350 milliard AQSh dollaryn qurady. Keiingi bes jylda Qazaqstan jyl saiyn orta eseppen 21,3 milliard dollarǵa jýyq tikelei sheteldik investitsiia tartty. Búkil álemde karantin sharalary kúsheitilip, óndiris toqtatylǵan kezde Qazaqstan úkimeti jobalardyń toqtap qalýyna jol bermei, jańa investorlardy tartý jaǵynan ýaqtyly sharalardy qabyldady. Osylaisha, 2020 jyly 3800-den astam jumys ornyn qura otyryp, jalpy quny 1,3 milliard AQSh dollaryna 25 iri investitsiialyq nysan paidalanýǵa berildi», - deidi Ranking.
Zertteý málimetterine sáikes, Qazaqstanǵa investitsiia salatyn memleketterdiń ondyǵyn Niderlandy, AQSh, Shveitsariia, Resei, Ulybritaniia, Belgiia, Frantsiia, Qytai, Ońtústik Koreia men Kipr quraidy.
