7-8 shilde kúnderi Nur-Sultan qalasynda «Astana formatynda» Siriia boiynsha kelissózderdiń kezekti raýndy ótedi. Búgin Qazaqstan elordasyna BUU delegatsiiasy keldi, dep habarlaidy "Ult aqparat".
QR Syrtqy ister ministrliginiń málimetine sáikes, Nur-Sultanǵa BUU Bas hatshysynyń Siriia boiynsha arnaiy elshisi Geir Pedersen jetti. Ol buǵan deiin aldaǵy kezdesýge qatysatynyn qýattaǵan bolatyn.
7-8 shildede ótetin «Astana formatyndaǵy «Siriia boiynsha kelissózderge Siriia Arab Respýblikasy atynan Syrtqy ister ministrliginiń basshysy, al qarýly oppozitsiiadan Ahmad Toma qatysady.
Buǵan deiin QR SIM málim etkendei, Siriia boiynsha joǵary deńgeidegi 16-shy halyqaralyq kezdesýge kepilger elder - Iran, Resei jáne Túrkiia, sondai-aq Siriianyń úkimeti men qarýly oppozitsiiasy ókilderiniń qatysýy josparlanǵan. Baqylaýshylar retinde BUU, Iordaniia, Irak pen Livannyń joǵary deńgeidegi ókilderi qatysady.
Kelissózderdiń kún tártibine kelesi máseleler kiredi:
- Siriiadaǵy, onyń ishinde áleýmettik-ekonomikalyq jáne sanitarlyq-epidemiologiialyq ahýal;
- Siriiaǵa halyqaralyq izgilik kómek kórsetý;
- Jenevadaǵy siriialyq Konstitýtsiialyq komitet jumysynyń jandaný perspektivalary;
- taraptar arasyndaǵy senimdi nyǵaitý, onyń ishinde tutqyndarmen almasý, kepilge alynǵandardy bosatý jáne iz-túzsiz joǵalǵandardy izdeý.
«Kelissózderdiń birinshi kúni ekijaqty jáne kepilger elderdiń úshjaqty konsýltatsiialaryn, siriialyq taraptarmen kelissózder, baqylaýshy taraptardyń delegatsiialarymen bailanystar, al ekinshi kúni konsýltatsiialardy jalǵastyrý jáne Jalpy otyrys ótkizý josparlanýda.
Sonymen qatar kepilger elderdiń, BUU jáne Halyqaralyq qyzyl krest komiteti sarapshylarynyń qatysýymen májbúrlep ustalyp otyrǵan tulǵalar boiynsha Jumys tobynyń kezekti otyrysy kózdelgen», - delingen edi QR SIM habarlamasynda.
