Energetika ministri Bolat Aqsholaqov qazaqstandyqtardan elden janarmai shyǵarý derekteri men áreketteri týraly habarlaýdy surady, - dep habarlaidy Tengrinews.kz agenttigi.
"Barlyq janar-jaǵarmai quiý stantsiiasy jelilerin 15 qyrkúiekke, aqparattyq júie (janarmai quiý beketterinde dizel otynyn satý úshin tutynýshy derekteri tekseriledi) engizilgenge deiin adam faktoryn múmkindiginshe boldyrmaý úshin qyzmetkerlermen jumys isteýge shaqyrdyq", - dedi ministr.
Energetika ministrliginiń basshysy barlyq iri janar-jaǵarmai quiý beketine turǵyndar aryz-shaǵymmen júgine alatyn senim telefondaryn ashý tapsyrylǵanyn atap ótti.
"Elimizde janar-jaǵarmai quiý beketteri óte kóp, sondyqtan azamattar osy telefondar arqyly janarmai quiý stantsiialaryndaǵy zańbuzýshylyqtary nemese zańsyz janarmai quiý týraly habarlasa, durys bolar edi. Videolardan janarmai kólik bakterine emes, júksalǵyshta turǵan ydystarǵa quiylǵanyn kórdik. Osyndai jaǵdailarǵa kýá bolsańyz habarlańyz.
Búgin men ministrlikte osyndai telefon jelisin ashýdy tapsyrdym, sonda adamdar ministrlikke tikelei habarlasyp, osyndai derekterdi aita alady. Memlekettik organdar dereý jaýap beredi. Barshańyzdan úles qosýyńyzdy suraimyn, birlesken kúsh-jiger arqyly bul másele sheshiledi dep oilaimyn", - dep túiindedi Aqsholaqov.
