Qazaqstandyqtarǵa ámbebap áleýmettik ID-kartalar taratylady. Árbir azamatqa, sonyń ishinde oqýshylar men zeinetkerlerge beriletin kartalar tegin bolmaq, - dep habarlaidy "Ult aqparat".
Ámbebap kartany engizý QR Eńbek jáne halyqty áleýmettik qorǵaý ministrligi men «Eńbek resýrstaryn damytý ortalyǵy» AQ júzege asyratyn «Qazaqstan azamatynyń áleýmettik ID» jobasy aiasynda júrgiziledi. Joba Aqtóbe qalasynda sátti synaqtan ótti, endi ony elimizdiń barlyq óńirlerinde engizý bastaldy. Kartany 2020 jyldyń sońyna deiin taratyp bitý josparlanǵan.
ID kartany barlyq qazaqstandyqtar ala alady jáne ol tegin bolady. Birinshi kezekte olar zeinetkerlerge, memlekettik járdemaqylardyń barlyq túrin alýshylarǵa, sondai-aq oqýshylarǵa beriledi. Karta berýmen «Qazposhta» AQ ainalysady.
Ámbebap kartada birqatar memlekettik qyzmetter biriktiriledi: zeinetaqy men járdemaqy alý, qoǵamdyq kólikte jol júrý aqysyn tóleý, saýda, meditsinalyq jáne basqa da jelilerdegi taýarlar men qyzmetter úshin esep aiyrysýǵa bolady. Budan bólek, jol júrýge 50% jeńildik, shipajaida demalýǵa 100% ótemaqy alý múmkindigi bar.
Bul rette kartaǵa «maqsatty baqylaý» dep atalatyn júie engizilmek. Bul, memlekettiń zattai jeńildikterdiń ornyna aqshalai beriletin qarajattyń (mysaly, balalar taǵamy, qalalyq kólikte júrý) basqa maqsattarǵa jumsalmaýyn qadaǵalaý úshin qajet.
Aita keteiik, «Qazpochta» AQ bólimsheleriniń kassalarynda járdemaqy men zeinetaqy alýdyń balamaly tásili aldaǵy jyldary saqtalatyn bolady. Úkimet sheshimine sáikes ámbebap kartaǵa tolyq kóshý 2023 jylǵa qarai aiaqtalýy tiis.
«Ártúrli nusqalar qarastyryldy, sonyń ishinde NFS tehnologiiasy bar QR-kodtar men smartfondardy paidalaný boldy. Alaida, mundai sheshimder belgili bir qiyndyqtarǵa bailanysty qabyldanbady. Birinshiden, kóptegen zeinet jasyndaǵy azamattar smart-qurylǵylardy tolyq qoldana almaidy. Ekinshiden, barlyq óńirlerdiń turǵyndary internetpen qamtylmaǵan. Sondyqtan ID kartany – onlain jáne oflain paidalana alý úshin plastikalyq karta túrinde shyǵarý týraly sheshim qabyldandy. Barlyq azamattar ony qalai paidalaný kerektigin biledi», - deidi «Eńbek resýrstaryn damytý ortalyǵy» AQ múgedektikti belgileý jáne áleýmettik qyzmetterdi kórsetý boiynsha AJ damytý jáne súiemeldeý departamenti direktorynyń orynbasary Álisher Elýbaev.
