Qazaqstanǵa qarjylai aýdarym júiesi arqyly shetelden jiberilgen aqsha kólemi aitarlyqtai azaidy, dep habarlaidy QazAqparat finprom.kz saityna silteme jasap.
Osy jyldyń qańtar aiynda elimizge shet memleketterden jiberilgen qarajat kólemi 13,6 mlrd teńgeni qurady. Bul 2021 jylǵy kezeńmen salystyrǵanda 30,5 % az. Bul kórsetkish úshinshi jyl qatarynan tómendep keledi.
Qazaqstanǵa aqsha aýdarym júiesi arqyly shetelden jóneltilgen qarjynyń úshten ekisi AQSh dollarymen júzege asqan. Máselen, biylǵy qańtarda bul san 63,9 % quraǵan. Odan keiin ulttyq valiýta tur — teńge aýdarymdarynyń jalpy kólemi 25 % jetip jyǵylady. Rýblmen aýdarylǵan qarajattyń úlesi osymen tórtinshi jyl qatarynan qysqarýda. 2022 jyldyń qańtarynda ol 6,1 % qurady. Eýronyń úlesi - 4,9 %.
Amerika valiýtasymen alynǵan bir aýdarymnyń ortasha chegi bir jyl ishinde 780 dollardan 758 dollarǵa deiin tómendedi. Teńgemen bir aýdarymnyń ortasha chegi, kerisinshe, 127,7 myńnan 190,9 myń teńgege deiin ulǵaidy. Resei valiýtasyndaǵy bir aýdarymnyń ortasha chegi de ósken – 22,5 myńnan 23,6 myń rýblge deiin. Eýrovaliýtadaǵy bir aýdarymnyń ortasha chegi 436-dan 400 eýroǵa deiin kemigen.
2022 jylǵy qańtarda júzege asyrylǵan aqshalai aýdarymnyń eń úlken kólemi Ózbekstannan jóneltildi – 2,5 mlrd teńge. Odan keiin Ońtústik Koreiadan – 2,1 mlrd teńge, AQSh-tan 1,9 mlrd teńge túsken. Buǵan deiin kóshbasshy bolǵan Resei jyl basynda nebári 1,6 mlrd teńge aýdarym kólemimen tórtinshi orynǵa ornalasty.
