قازاقستانعا قارجىلاي اۋدارىم جٷيەسٸ ارقىلى شەتەلدەن جٸبەرٸلگەن اقشا كٶلەمٸ ايتارلىقتاي ازايدى, دەپ حابارلايدى قازاقپارات finprom.kz سايتىنا سٸلتەمە جاساپ.
وسى جىلدىڭ قاڭتار ايىندا ەلٸمٸزگە شەت مەملەكەتتەردەن جٸبەرٸلگەن قاراجات كٶلەمٸ 13,6 ملرد تەڭگەنٸ قۇرادى. بۇل 2021 جىلعى كەزەڭمەن سالىستىرعاندا 30,5 % از. بۇل كٶرسەتكٸش ٷشٸنشٸ جىل قاتارىنان تٶمەندەپ كەلەدٸ.
قازاقستانعا اقشا اۋدارىم جٷيەسٸ ارقىلى شەتەلدەن جٶنەلتٸلگەن قارجىنىڭ ٷشتەن ەكٸسٸ اقش دوللارىمەن جٷزەگە اسقان. مەسەلەن, بيىلعى قاڭتاردا بۇل سان 63,9 % قۇراعان. ودان كەيٸن ۇلتتىق ۆاليۋتا تۇر — تەڭگە اۋدارىمدارىنىڭ جالپى كٶلەمٸ 25 % جەتٸپ جىعىلادى. رۋبلمەن اۋدارىلعان قاراجاتتىڭ ٷلەسٸ وسىمەن تٶرتٸنشٸ جىل قاتارىنان قىسقارۋدا. 2022 جىلدىڭ قاڭتارىندا ول 6,1 % قۇرادى. ەۋرونىڭ ٷلەسٸ - 4,9 %.
امەريكا ۆاليۋتاسىمەن الىنعان بٸر اۋدارىمنىڭ ورتاشا چەگٸ بٸر جىل ٸشٸندە 780 دوللاردان 758 دوللارعا دەيٸن تٶمەندەدٸ. تەڭگەمەن بٸر اۋدارىمنىڭ ورتاشا چەگٸ, كەرٸسٸنشە, 127,7 مىڭنان 190,9 مىڭ تەڭگەگە دەيٸن ۇلعايدى. رەسەي ۆاليۋتاسىنداعى بٸر اۋدارىمنىڭ ورتاشا چەگٸ دە ٶسكەن – 22,5 مىڭنان 23,6 مىڭ رۋبلگە دەيٸن. ەۋروۆاليۋتاداعى بٸر اۋدارىمنىڭ ورتاشا چەگٸ 436-دان 400 ەۋروعا دەيٸن كەمٸگەن.
2022 جىلعى قاڭتاردا جٷزەگە اسىرىلعان اقشالاي اۋدارىمنىڭ ەڭ ٷلكەن كٶلەمٸ ٶزبەكستاننان جٶنەلتٸلدٸ – 2,5 ملرد تەڭگە. ودان كەيٸن وڭتٷستٸك كورەيادان – 2,1 ملرد تەڭگە, اقش-تان 1,9 ملرد تەڭگە تٷسكەن. بۇعان دەيٸن كٶشباسشى بولعان رەسەي جىل باسىندا نەبەرٸ 1,6 ملرد تەڭگە اۋدارىم كٶلەمٸمەن تٶرتٸنشٸ ورىنعا ورنالاستى.
