«Biryńǵai jinaqtaýshy zeinetaqy qory» AQ 2020 jyldyń 1 naýryzyndaǵy negizgi kórsetkishterin jariialady, dep habarlaidy "Ult aqparat".
Qazaqstannyń asa mańyzdy qarjy institýttarynyń biri «BJZQ» AQ-nyń zeinetaqy aktivteri 2020 jyldyń alǵashqy eki aiynda 283 milliard teńgege ulǵaidy. Osylaisha azamattardyń zeinetaqy jinaqtary 11 trillionnan asyp, eki aidaǵy ósim 3% jetti.
Zeinetaqy jinaqtarynyń negizgi somasy mindetti zeinetaqy jarnalary (MZJ) boiynsha qalyptasty jáne sońǵy 12 aida 17%-ǵa ulǵaiyp, 10,8 trln teńgeni qurady. Mindetti kásiptik zeinetaqy jarnalary (MKZJ) boiynsha zeinetaqy jinaqtarynyń somasy 257 mlrd teńge (ósim 25%), al erikti zeinetaqy jarnalary (EZJ) boiynsha zeinetaqy jinaqtarynyń somasy 2 mlrd teńgege (ósim 6%) jýyq.
Aita keteiik, «BJZQ» AQ jarnalarynyń barlyq túrleri boiynsha jeke zeinetaqy shottarynyń jalpy sany - 10 498 852 birlik boldy. Ótken jyldyń naýryz aiynan bastap ósim 3%. Jeke zeinetaqy shottardyń basym bóligin mindetti zeinetaqy jarnalary – 9,9 mln (ósim 3%), odan keiin mindetti kásiptik zeinetaqy jarnalary – 514 myń shotty (ósim 6%) qurady. Eń úlken ósim erikti zeinetaqy jarnalary boiynsha baiqaldy, 2020 jyldyń 1 naýryzyna BJZQ-da 55 221 shot boldy, bul 2019 jylǵy kórsetkishten 12% joǵary.
Zeinetaqy qorynyń tehnikalyq sharttar boiynsha jumysyn atap ótý mańyzdy. Buǵan sáikestendirilmegen salymshylardyń (alýshylardyń) JZSh-lary jatady, mundai shottarda jeke sáikestendirý nómiri (JSN) joq, sondai-aq tegi, aty, ákesiniń aty men týǵan kúni boiynsha qate derektemeler kórsetilgen (JSN joq JZSh). 2019 jylǵy 1 naýryzdan bastap 2020 jylǵy 1 naýryzǵa deiin BJZQ qyzmetkerleri osyndai 20 myńnan astam shottardy anyqtap, olardyń jalpy sanyn 11% qysqartýǵa qol jetkizildi. Osylaisha aǵymdaǵy jyldyń 1 naýryzyna BJZQ-da 186,8 myń tehnikalyq shart qalyp otyr.
Salymshylardyń (alýshylardyń) MZJ boiynsha jeke zeinetaqy shottaryndaǵy ortasha jinaq kólemi (tehnikalyq sharttardy esepke almaǵanda) 1,11 mln.teńgege jetti, bul ótken jyldyń sáikes kezeńimen salystyrǵanda 12% kóp.
2020 jyldyń alǵashqy 2 aiynda salymshylardyń shottaryna jalpy kólemi 175,2 mlrd. teńge zeinetaqy jarnalary tústi, bul 2019 jyldyń alǵashqy 2 aiyndaǵy kórsetkishten 20% artyq. Tólemder 32,1 mlrd teńgeni qurady, olardyń basym bóligi jasyna bailanysty (12,2 mlrd teńge), Qazaqstanan ketý boiynsha (8,4 mlrd. teńge), saqtandyrý uiymdaryna aýdarymdar (5,4 mlrd teńge), muragerlerge (5,2 mlrd teńge) berilgen tólemderden turady. Salymshylardyń shottaryna aýdarylǵan taza investitsiialyq kiris 139,9 mlrd teńge mólsherinde esepke alyndy.
