2020 jyldyń naýryz aiynyń sońyn eseptegende Ulttyq bankke senip basqarylatyn BJZQ zeinetaqy aktiviniń mólsheri 11,7 trln teńgeni qurady. Bul soma bir jyl burynǵy kórsetkishten (9,6 trln teńge) 2,1 trln teńgege nemese 21 paiyzǵa artyq, dep habarlaidy "Ult aqparat" ranking.kz aqparat kózine silteme jasap.
Osy jyldyń naýryz aiynyń sońynda jarnanyń barlyq túri boiynsha jeke zeinetaqy shottarynyń (JZSh) jalpy sany 2,7 paiyzǵa ulǵaiyp, 10,7 millionǵa jetti. JZSh-lardyń basym bóligin burynǵysha mindetti zeinetaqy jarnalary (10,1 mln) quraidy. Al mindetti kásibi zeinetaqy jarnalary boiynsha shottardyń sany 514,8 myńǵa jetken. Óz erkimen zeinetaqy jarnasyn aýdaryp, shot ashyp jatqandardyń da sany kóbeiip keledi. Bir jyldyń ishinde bul sanatta 55,4 myń shot (11,6 paiyzǵa kóbeigen) ashylǵan.
Zeinetaqy aktivteriniń kirisin saqtap, arttyryp otyrý úshin investitsiialyq portfeldi diversifikatsiialaý boiynsha jumys turaqty negizde júrgizilip keledi. Máselen BJZQ-nyń zeinetaqy aktivi portfeliniń basym úlesin burynǵydai investitsiialaýdyń turaqty ári kirisi mol quraly sanalatyn QR memlekettik qundy qaǵazdary (42 paiyzy nemese 4,9 trln teńge) quraidy. Buǵan qosa 2015 jyly olardyń úlesi 46 paiyzǵa teń bolǵan edi.
Sonymen qatar 2015 jyldyń mamyr aiynyń sońynda Qazaqstannyń uiymdaryndaǵy qundy qaǵazdardyń zeinetaqy aktivi portfelindegi úlesi 31,3 paiyzǵa teń bolsa, osy jyldyń mamyr aiynyń sońynda bul úles 27,2 paiyzdy kórsetti.
2019 jyldyń qarasha aiynda zeinetaqy aktivterin basqarýdyń tiimdiligin arttyrýǵa baǵyttalǵan jumystar aiasynda zeinetaqy aktivi portfelindegi valiýtanyń bir bóligin sheteldik basqarýshy kompaniialarǵa kezeń-kezeńimen berý protsesi bastalǵan edi. Jalpy portfeldi syrtqy basqarýǵa berý boiynsha tórt halyqaralyq kompaniia tańdalyp alynǵan bolatyn. Osynyń nátijesinde 2019 jyldyń naýryz aiynda syrtqy basqarýdaǵy aktivter úlesi BJZQ- investitsiialyq portfeliniń 1 paiyzyn qurasa, 2020 jyly bul kórsetkish 3,3 paiyzǵa nemese 385,3 mlrd teńgege teńesti.
