Qazaqstandyqtardyń ortasha otbasylyq tabysy 421,5 myń teńgege jetti. Bul týraly "Ult aqparat" Finprom.kz silteme jasap habarlaidy.
«2019 jylǵy ekinshi toqsannyń qorytyndysy boiynsha, úi sharýashylyqtarynyń aqshalai tabysy 579 myń teńgeni qurap, ótken jyldyń sáikes kezeńimen salystyrǵanda 10,7%-ǵa artty. Otbasylyq kirister ósýiniń negizgi kózi eńbek qyzmetinen túsetin tabystardyń ortasha eseppen 7,6 paiyzǵa artýymen bailanysty. Ekinshi toqsan sońyndaǵy derekter boiynsha árbir otbasy eńbek qyzmetimen orta eseppen 421,5 myń teńge tabady», - dep jazady Finprom.kz.
Saittyń jazýyna qaraǵanda, úi ishi tabysynyń eń úlken somasy Mańǵystaý oblysynda tirkelgen (852,2 myń teńge). Otbasylary orta eseppen 741,2 myń teńge tabatyn Nur-Sultan qalasy ekinshi orynda tursa, 673,2 myń teńgelik kórsetkishpen Qyzylorda oblysy úzdik úshtikti túiindep tur.
Eldiń 7 óńirinde otbasylyq tabys mólsheri 421,5 myń teńge kólemindegi respýblikalyq ortasha kórsetkishten joǵary bolǵan.
Finprom.kz. málimeti boiynsha, qazaqstandyq otbasylardyń shyǵyny tabysynan asyp túsken. Ekinshi toqsan qorytyndysy boiynsha, bir otbasynyń oratasha shyǵyny 543,3 myń teńge bolyp otyr.
Shyǵyn kólemi boiynsha Almaty qalasy (680,8 myń teńge), Atyraý (638,8 myń teńge) jáne Qaraǵandy oblystary (630,8 myń teńge) alǵashqy úshtikte tur. Óńirler arasynda bárinen de Pavlodar oblysyndaǵy otbasylardyń shyǵyny qatty artqan (15,8 paiyz).
«Bul shyǵyndardyń 62,7 paiyzy tutyný shyǵyndarymen bailanysty. Ekinshi toqsanda ortasha otbasylyq shyǵyn 543,3 myń teńge dep eseptegende, onyń 504 myń teńgesi tutyný shyǵyndaryna, 24,9 myń teńgesi nesie men qaryzdardy jabýǵa, 13,8 myń teńgesi aliment tóleý siiaqty týysqandyq kómekke, 693 teńgesi salyq óteýge jumsalǵan», - delingen málimette.
