Qazaqstan halqynyń 25 paiyzy PIAAC nátijesinde saýattylyqtyń joǵary deńgeiin kórsetti. Bul týraly «Aqparattyq-saraptamalyq ortalyq» AQ prezidenti Erlan Shýlanov aitty, dep habarlaidy QazAqparat.
«16 men 65 jas aralyǵynda eresek halyqtyń daǵdysyn baǵalaýǵa nazar aýdartqym keledi. PIAAC zertteýi 2018 jyly júrgizildi. Jalpy nátije mynadai: Qazaqstan halqy tabysy uqsas 39 eldiń ishinde úzdik nátije kórsetti. Bul Dúniejúzilik banktiń damýshy elder jiktemesi boiynsha. Bul rette kóptegen pozitsiiada biz Eýropa yntymaqtastyq jáne damý uiymynyń (EYDU) jetekshi elderinen qalyp kelemiz. Ólshem el tarihynda alǵash ret ótkizilip otyr. Zertteý aiasynda alynǵan málimetterdiń balamasy joq. Óitkeni, óte kóp eldermen salystyrýlar bar. Zertteý oqý saýattylyǵy, matematikalyq saýattylyq jáne joǵary tehnologiialyq ortada tapsyrmalardy sheshý daǵdylary boiynsha júrgizildi. Qazaqstannyń barlyq óńirinen túrli jastaǵy 6 myń adam qatysty. Zertteý test tapsyrmalaryn elektrondy jáne qaǵaz formatta toltyrý arqyly júrgizildi», - dedi Erlan Shýlanov Bilim jáne ǵylym ministrliginiń apparattyq keńesi barysynda.
Onyń dereginshe, oqý saýattylyǵy boiynsha qazaqstandyqtardyń kórsetkishi Túrkiia men Meksikadan asyp túsip, Italiia men Ispaniia syndy elderdiń deńgeiimen shamalas bolǵan. Al matematikalyq saýattylyqtan EYDU-nyń ortasha kórsetkishinen artta qalý baiqalady. Degenmen, Qazaqstan 247 balmen 31-orynda tur. Bul Meksika, Ispaniia, Túrkiia, Italiia elderiniń kórsetkishinen áldeqaida jaqsy jáne Izrail deńgeiimen shamalas.
«Joǵary tehnologiialyq ortada tapsyrmalardy sheshý daǵdysy boiynsha Qazaqstannyń kórsetkishi EYDU-nyń ortasha deńgeiinen artta qalyp otyr. Bul rette biz Túrkiia men Meksikany basyp ozyp, Shyǵys Eýropanyń birqatar elderi deńgeiindegi daǵdyny kórsetip otyrmyz. Kórsetkish jaman emes bolǵanymen saralaityn jaittar da bar. Tyńǵylyq saraptaý barysynda halyqtyń 50 paiyzy oqý saýaty boiynsha ortasha deńgei, 25 paiyzy joǵary deńgei kórsetti. Halyqtyń shamamen 25 paiyzynyń kórsetkishi tym tómen», - dedi ol.
