Prezident Túrkistan jáne Qaraǵandy oblystaryndaǵy jaǵdaiǵa bailanysty keńes ótkizdi.
Bul jóninde Prezidenttiń baspasóz hatshysy Berik Ýáli málimet taratty.
«Memleket basshysy Shornaq aýyly men Sátbaev qalasyndaǵy oqiǵalarǵa bailanysty Prezident Ákimshiliginiń basshylyǵymen, Túrkistan jáne Qaraǵandy oblystarynyń ákimderimen, quqyq qorǵaý organdarynyń basshylyǵymen keńes ótkizdi. Der kezinde qabyldanǵan sheshimderdiń arqasynda Shornaq aýyly men Sátbaev qalasyndaǵy jaǵdai turaqtaldy. Tártipsizdiktiń qaitalanýyna eshqandai sebep joq» dep jazdy Berik Ýáli Facebook paraqshasynda.
Onyń aitýynsha, Prezident jaǵdaidy baqylaýda ustap, jergilikti turǵyndar arasynda túsindirý jumystaryn júrgizýdi, el ishindegi turaqtylyqty buzýǵa talpynǵan arandatýshylardyń aldyn alýdy, quqyq buzýshylardy zań aiasynda jaýapkershilikke tartýdy tapsyrǵan.
«Sonymen qatar ol atalǵan aimaqtardaǵy halyqtyń eń basty áleýmettik-ekonomikalyq qajettilikterine nazar aýdarý kerek ekenin aitty. Al quqyq qorǵaý organdaryna kámelet jasyna tolmaǵan qyzdy zorlamaq boldy degen kúdikpen ustalǵan Sátbaev qalasynyń turǵynyna qatysty tergeý jumystaryn jan-jaqty júrgizip, onyń qorytyndysy týraly jurtshylyqqa naqty aqparat berý týraly tapsyrma berdi» dep atap ótti Prezidenttiń baspasóz hatshysy.
Sátbaevtaǵy tolqý
24 shildege qaraǵan túni Sátbaev qalasynda tártipsizdikter bastaldy. Oǵan joǵalǵan 5 jasar qyzdyń belgisiz er adamnyń páterinen tabylýy sebep bolǵan.
Búldirshindi búkil qaladan izdedi. Bala tabylǵannan keiin kúdikti turatyn úidiń mańyna bir top adam jinaldy. Olar kúdiktini ózderi jazalamaq bolǵan.
Ashýly top barlyq páterdiń esigin qaǵyp, turǵyndardyń záresin ushyrǵan.
Halyq tolqýyn basý úshin qalaǵa Ulttyq ulan kúshteri tartyldy.
Sodan keiin jinalǵandar kúdiktini berýdi talap etip, qalalyq ákimdikke qarai bet aldy.
Qala biligi bala anasynyń qasynda ekenin málimdedi jáne turǵyndardy arandatýshylyqqa ermeýge shaqyrdy.
Tańǵa qarai qalada jaǵdai turaqtaldy.
Er adam búldirshindi urlap, zorlady dep aiyptalyp otyr. Tergeý júrgizilýde.
Shornaqtaǵy tártipsizdik
21 shildege qaraǵan túni Túrkistan oblysy Shornaq aýylynda jastar arasynda turmystyq janjal bolǵan.
Eki jaq bir-birine tas laqtyryp, saldarynan 1 ýchaskelik inspektor men 3 turǵyn jaraqat aldy.
Jedel izdestirý sharalary barysynda janjalǵa qatysy bar 4 adam ustaldy.
Buzaqylyq jáne bilik ókiline kúsh qoldaný faktilerine qatysty sotqa deiingi tergeý júrip jatyr.
Ishki ister ministri eldi mekende jaǵdai turaqtalǵanyn málimdedi.
