QR Eńbek jáne halyqty áleýmettik qorǵaý ministrligi 5 qańtardan bastap elektrondyq eńbek birjasy enbek.kz portaly arqyly halyqty jumyspen qamtý ortalyǵynyń qyzmetterin qashyqtan ala alatyn qalalardyń tizbesin keńeitti, dep habarlaidy "Ult aqparat".
Budan buryn habarlanǵandai, 2020 jylǵy 17 qarashada jumyssyzdardy tirkeý rásimderin ońailatý jáne jumyspen qamtýdy qoldaý boiynsha memlekettik qyzmetterdi alýdy jeńildetý úshin Eńbekmini respýblikalyq mańyzy bar qalalar men oblys ortalyqtarynyń turǵyndary úshin elektrondyq eńbek birjasy arqyly HJQO qyzmetterin qashyqtyqtan kórsetý boiynsha pilottyq jobany iske qosty.
EEB-daǵy «jeke kabinette» qazaqstandyqtar jumys izdep júrgen adam nemese jumyssyz retinde esepke turyp, tirkeýdiń barlyq kezeńderin qadaǵalai alady.
Jumyssyz mártebesin alǵannan keiin azamattar onlain rejiminde EEB-da jumysynan aiyrylý boiynsha áleýmettik tólemge ótinim jibere alady jáne memleket sýbsidiialaityn jumys oryndaryna – jastar praktikasyna, áleýmettik jumys oryndaryna, qoǵamdyq jumystarǵa bos jumys oryndaryn óz betinshe tańdai alady. Joǵaryda kórsetilgen qyzmetterdi onlain rejimde alý úshin elektrondyq tsifrlyq qoltańbany paidalana otyryp, EEB-da tirkeýden ótý qajet. Qyzmetterdi qashyqtyqtan alý múmkindigin 1400-den astam adam paidalanyp úlgerdi. 1015 azamat jumyssyz mártebesin aldy. 260-tan astam jumyssyz adam jumysynan aiyrylǵan jaǵdaida áleýmettik tólemder alýǵa ótinimder jiberdi, onyń 80%-yn Memlekettik áleýmettik saqtandyrý qory maquldady.
«Jumys izdep, jumyspen qamtý ortalyǵyna barǵysy keletin azamattarǵa úiden shyǵýdyń qajeti joq. Munyń bárin birneshe minýt ishinde Enbek.kz portalynda jasaýǵa bolady ol úshin tek interneti bar kompiýter men elektrondyq tsifrlyq qoltańba bolýy kerek. Qyzmet tolyqtai avtomattandyrylǵan. Bul degenimiz, eger úsh jumys kúni ishinde portal jumys izdeýshi adamǵa laiyqty jumys taba almasa, onda elektrondyq eńbek birjasy jumyssyz retinde tirkeýdi avtomatty túrde júzege asyrady. Osylaisha, adam faktory tolyǵymen joiylady», – dedi Eńbek jáne halyqty áleýmettik qorǵaý vitse-ministri Erbol Ospanov.
Internet nemese kompiýter bolmaǵan jaǵdaida, barlyq jumyspen qamtý ortalyqtarynda qurylǵan ózine-ózi qyzmet kórsetý aimaqtarynda EEB arqyly qyzmetterdi alýǵa bolady. HJQO qyzmetkerleri onlain usynylatyn qyzmetter boiynsha qajetti keńester beredi. Bul azamattarǵa jumyspen qamtý ortalyǵynyń mamanyna qabyldaýǵa kezek kútpeýge jáne COVID-19 pandemiiasy jaǵdaiynda adamdardyń bailanysyn azaitýǵa múmkindik beredi.
«2021 jylǵy 5 qańtardan bastap EEB arqyly onlain qyzmet kórsetý mehanizmi oblystyq mańyzy bar taǵy 23 qalada halyqqa qoljetimdi bolady. Al jyldyń ekinshi jartysynda Qazaqstannyń barlyq turǵyny jańa servisterdi paidalana alady. Sondai-aq, azamattar úshin elektrondyq eńbek birjasynda jumyspen qamtý salasyndaǵy qyzmetter tizbesi únemi keńeitiletin bolady», – dep tolyqtyrdy Erbol Ospanov.
EEB arqyly HJQO qyzmetteri endi Nur-Sultan, Almaty, Shymkent qalalarynyń, barlyq oblys ortalyqtarynyń, sondai-aq Stepnogorsk, Tekeli, Qapshaǵai, Kýrchatov, Ridder, Semei, Qarajal, Sátbaev, Priozersk, Jezqazǵan, Temirtaý, Balqash, Shahtinsk, Saran, Arqalyq, Lisakov, Rýdnyi, Baiqońyr, Jańaózen, Aqsý, Ekibastuz, Arys, Kentaý qalalarynyń turǵyndary úshin qoljetimdi. Onlain qyzmet kórsetý týraly tolyq aqparatty enbek.kz saitynan jáne halyqty jumyspen qamtý ortalyǵynan alýǵa bolady. Jumys izdep júrgen adamdar myna silteme boiynsha elektrondy eńbek birjasynda onlain tirkele alady.
