Qazaqstandyqtar jumyspen qamtý ortalyqtarynyń qyzmetterin onlain rejimde ala alady, dep habarlaidy "Ult aqparat".
Qazaqstannyń barlyq óńiriniń turǵyndary mamyr aiynan bastap Enbek.kz portaly arqyly halyqty jumyspen qamtý ortalyqtarynyń qyzmetterin qashyqtan ala alady.
Budan buryn habarlanǵandai, 2020 jylǵy 17 qarashada jumyssyzdardy tirkeý rásimderin jeńildetý jáne jumyspen qamtý memlekettik qyzmetterin alýdy jeńildetý úshin QR Eńbek jáne halyqty áleýmettik qorǵaý ministrligi respýblikalyq mańyzy bar qalalar men oblys ortalyqtarynyń turǵyndaryna elektrondyq eńbek birjasy arqyly HJQO qyzmetterin qashyqtan kórsetý boiynsha pilottyq jobany iske qosty.
Osy jyldyń 5 qańtarynan bastap respýblikanyń 40 qalasynyń turǵyndaryna, al mamyrdan bastap barlyq qazaqstandyqtarǵa osy múmkindik berildi.
EEB-tegi «Jeke kabinette» qazaqstandyqtar jumys izdeýshi adam nemese jumyssyz retinde esepke tura alady jáne tirkeýdiń barlyq kezeńderin qadaǵalai alady.
Jumyssyz mártebesin alǵannan keiin azamattar (áleýmettik saqtandyrý júiesine qatysýshylar) onlain rejimde EEB-da jumysynan aiyrylý boiynsha áleýmettik tólemge ótinim jibere alady jáne memleket sýbsidiialaityn jumys oryndaryn – jastar praktikasyn, áleýmettik jumys oryndaryn, qoǵamdyq jumysty óz betinshe tańdai alady.
Joǵaryda kórsetilgen qyzmetterdi onlain rejimde alý úshin elektrondyq tsifrlyq qoltańbany paidalana otyryp, EEB-da tirkeýden ótý qajet.
Jyl basynan beri qyzmetterdi qashyqtyqtan alý múmkindigin 34 myńnan astam adam paidalandy. 30 myń azamat jumyssyz mártebesin aldy.
«Jumys izdep, jumyspen qamtý ortalyǵyna barǵysy keletin azamattarǵa úiden shyǵýdyń qajeti joq. Munyń bárin birneshe minýt ishinde Enbek.kz portalynda jasaýǵa bolady, ol úshin tek interneti bar kompiýter men elektrondyq tsifrlyq qoltańba bolýy kerek. Qyzmet tolyqtai avtomattandyrylǵan. Bul degenimiz, eger úsh jumys kúni ishinde portalda adamǵa laiyqty jumys tabylmasa, onda Elektrondyq eńbek birjasy jumyssyz retinde tirkeýdi avtomatty túrde júzege asyrady. Osylaisha, adami faktor tolyǵymen joiylady», – deidi Eńbek jáne halyqty áleýmettik qorǵaý vitse-ministri Erbol Ospanov.
Internet nemese kompiýter bolmaǵan jaǵdaida, barlyq jumyspen qamtý ortalyqtarynda qurylǵan ózine-ózi qyzmet kórsetý aimaqtarynda EEB arqyly qyzmetterdi alýǵa bolady.
HJQO qyzmetkerleri onlain usynylatyn qyzmetter boiynsha qajetti keńester beredi.
Bul azamattarǵa jumyspen qamtý ortalyǵynyń mamanyna qabyldaýǵa kezek kútpeýge jáne COVID-19 pandemiiasy jaǵdaiynda fizikalyq bailanystardy azaitýǵa múmkindik beredi.
Onlain qyzmet kórsetý týraly tolyq aqparatty enbek.kz saitynda jáne halyqty jumyspen qamtý ortalyǵynda alýǵa bolady.
Jumys izdep júrgen adam retinde elektrondy eńbek birjasynda onlain tirkelgisi kelgender myna siltemede tiisti málimetti ala alady.
