Qazaqstandyqtar úshin Táýelsizdik abstraktili uǵym emes. Mundai pikirdi QR Prezidenti janyndaǵy QSZI direktory, QR UǴA akademigi Zarema Sháýkenova bildirdi, dep habarlaidy QazAqparat.
«Osydan 30 jyl buryn halqymyzdyń tarihyndaǵy eń mańyzdy oqiǵalardyń biri – Qazaqstannyń Táýelsizdigin alýy. Bul oqiǵa tek qazaqstandyqtar úshin ǵana mańyzdy bolyp qoimai, sonymen qatar búkil adamzattyń damý traektoriiasyna oń áser etti. Álemde qolda bar iadrolyq arsenaldan bas tartqan alǵashqy memleket bola otyryp, Qazaqstan iadrolyq qarýdan azat álem qurý úshin tek saiasi erik-jiger ǵana qajet ekenin dáleldedi. Semei poligonyn jabý arqyly Qazaqstan álemde júrgizilgen barlyq iadrolyq synaqtardyń tórtten birin toqtatyp qana qoimai, iadrolyq synaqtardan bas tartýdyń jahandyq úrdisin qalyptastyrdy. Búginde álemniń 88 memleketi Iadrolyq qarýǵa tyiym salý týraly kelisimge qol qoidy. Biz adamzattyń osy jetistigine qosqan úlesimizdi maqtan ete alamyz», - dedi ol Elbasy amanaty: eldiktiń jeti tuǵyry» saraptamalyq dóńgek ústel otyrysynda.
Sonymen qatar ol Táýelsizdiktiń tórtinshi onjyldyǵyna qadam basqan qazaqstandyqtardyń basym kópshiligi bolashaqqa senimmen qaraityndyǵyn jáne óz elin maqtan etetindigin basa aitty
«Elordamyz, Qazaqstannyń halyqaralyq saiasi arenadaǵy jetistikteri, memlekettiń EKSPO, Qysqy Ýniversiada, kúres túrlerinen álem chempionaty siiaqty iri halyqaralyq sharalardy ótkizý múmkindigi maqtanysh sezimin oiatady. Gennadii Golovkin, Dimash Qudaibergen, Imanbek Zeikenov, Mariia Mýdriak, Daneliia Týlesheva, Skriptonit, Dana Aqylbekova, Artýr Turaliev jáne basqa da jerlesterimizdi maqtan tutamyz. Qazaqstandyqtar úshin Táýelsizdik abstraktili uǵym emes, onyń naqty praktikalyq mazmuny bar. Bul – bizdiń barlyq etnikalyq jáne konfessiialyq ártúrliligimizdegi birligimiz, ol damyǵan ekonomika, áleýmettik liftter, óz pikirimizdi ashyq bildirý jáne eldiń saiasi basqarýyna qatysý múmkindigi», - dedi Zarema Sháýkenova.
