Qazaqstandyqtar tehpasport pen kólik nómirin úige jetkizý qyzmetin belsendi paidalana bastady, dep habarlaidy "Ult aqparat".
«Azamattarǵa arnalǵan úkimet» memlekettik korporatsiiasy elektrondyq portal operatory – «Ulttyq aqparattyq tehnologiialar» AQ-men birlesip, tehpasport pen avtomobildiń memlekettik nómirlik belgisin qazaqstandyqtardyń úiine jetkizý qyzmetin iske qosqan bolatyn.
Qyzmetke eń kóp tapsyrys bergen óńirlerdiń qatarynda Qyzylorda oblysy men Shymkent jáne Almaty qalalary bar.
Buǵan deiin jańa kólikti onlain ne oflain túrde qaita tirkegen kólik iesi mashinanyń tirkeý nómiri men tehnikalyq pasportyn alý úshin mindetti túrde mamandandyrylǵan HQO-ǵa júginetin.
Endi kýrer qyzmetine tapsyrys berýshiler kóbine qalanyń syrtynda ornalasatyn avtoHQO-ǵa barý úshin ýaqytyn shyǵyndamaityn bolady.
Alǵash kólik alyp otyrǵan qyzylordalyq Ashat Keńes bul qyzmet týraly avtoHQO mamandarynan estigen.
Kóligin óz atyna rásimdep bolǵan soń, tirkeý nómiriniń daiyn bolýyn kútpei, onyń úige jetkizip berýin qalaǵan. Onyń aitýynsha, qazirgi tańda memlekettik qyzmetterdi avtomattandyrý belsendi túrde júrip jatyr.
«Barshamyz qyzmetterdi elektrondy úkimet portaly arqyly alýdamyz. Igiligin kórýdemiz. Tapsyrys bergennen keiin, kópke sozbai, HQO mamandary úiime nómirdi jetkizip berdi. Bul óte qolaily ári ońtaily eken» – deidi Ashat Talǵatuly.
Jańa avtokólik iesi onlain satyp alý mámilesinen keiin egov.kz portalyndaǵy «Kólik jáne kommýnikatsiia» bóliminde «MTNB men tehpasportty jetkizý» elektrondy qyzmetine tapsyrys berýi tiis.
Budan ári jeke derekterdi jáne kólik týraly málimetterdi (tehpasport, MTNB) toltyrý qajet, sondai-aq eń sońynda qujattar jetkizilýi tiis mekenjai kórsetilýi qajet. Kýrer qyzmetin paidalaný úshin 2240 tg tólenedi.
Ekibastuzdyq Dmitrii Fiodorov portal kómegimen kóliktiń daiyn bolǵan qujattaryn ǵana emes, jańa kóligin de qaita tirkep alǵan.
«Jarty saǵat ishinde onlain túrde kólikti óz atyma tirkep aldym. Sosyn kýrer qyzmetine tapsyrys berdim. Sol kúni barlyq qujattar qolyma tidi. AvtoHQO-ǵa múlde barǵan joqpyn. Tsifrlanýdyń igiligi degen osy» deidi ol.
Kelesi jyldan bastap, memlekettik korporatsiia dál osylaisha qyzmet alýshylardyń úilerine daiyn bolǵan qujattardy jetkizý qyzmetin iske qospaqshy.
Azamattar osylaisha HQO-ǵa barmai-aq, balanyń týý týraly kýáligin, jeke kýálikti, pasportty aldyrta alatyn bolady.
