Shekaradaǵy keptelis saldarynan Reseiden shyqqan qazaqtar úilerine qaita almai jatyr, - dep habarlaidy Tengrinews.kz tilshisi "Moi gorod" basylymyna silteme jasap.
Resei Federatsiiasynda mobilizatsiia bastalǵannan keiin shekarada kezek kóbeigen. Myńdaǵan reseilikter elden ketip jatyr. Olardyń kópshiligi Batys Qazaqstan oblysyndaǵy shekara beketine kelgen. Oral qalasynyń turǵyny Aleksandr otbasymen shekarada tórtinshi kún turǵanyn aitady.
"24 qyrkúiekte "Mashtakovo" ótkizý beketinde kezekke turdyq. Eki kúnnen beri kezek qozǵalmaidy. Tek júk kólikteri júredi. Qazaqstandyqtardyń barlyǵy elge kire almai otyr. Biz kóppiz. Barlyǵymyz jinalyp, qalaǵa bardyq. Shekarashylar máseleni sheship jatqan joq", - dep shaǵymdanady Oral turǵyny.
Aleksandrdyń aitýynsha, qiyndyq týǵyzyp jatqan taksi júrgizýshileri. Olar adamdardy shekaradan ótkizip, saptyń sońyna emes, qai jerden ketken bolsa, sol jerge qaitady. Al olardyń ornyn áriptesteri "kezek ustap" otyr. Aleksandr taksi júrgizýshileri shekaradan ótkeni úshin bir adamnan 6-7 myń rýbl (shamamen 57 myń teńge) alatynyn aitady.
Sondai-aq, kezekte turǵan qazaqstandyqtardyń azyǵy taýsylýǵa taiaǵanyn, jergilikti kásipkerler de taýar baǵasyn birneshe ese qymbattatqanyn aityp shaǵymdandy.
