Jalpy, ósimpuldardy esepten shyǵarý aktsiiasy bastalǵan kezde 1,5 mln jeke tulǵanyń jalpy qaryzy 26,3 mlrd teńge, onyń ishinde negizgi qaryz somasy 21,8 mlrd teńge, al ósimpul 4,5 mlrd teńgeni quraǵan bolatyn, dep habarlady QR QM Memlekettik kirister komitetinen.
Vedomstvoda atap ótkendei, ósimpuldardy esepten shyǵarýǵa arnalǵan aktsiianyń aiaqtalýyna eki aidan az ýaqyt qaldy.
Aǵymdaǵy jyldyń 6 qarashadaǵy jaǵdai boiynsha salyqtyq raqymshylyq múmkindikterin 400 myńǵa jýyq jeke tulǵa paidalandy, olar 5,5 mlrd teńge kólemindegi bereshekterin ótep, 612,2 mln teńge ósimpul esepten shyǵaryldy.
Almaty qalasy kólik salyǵy boiynsha ósimpuldardy esepten shyǵarýda kóshbasshylardyń qatarynda. Ońtústik megapolistiń turǵyny 2,3 mln teńge qaryzyn tólep, oǵan 1,6 mln teńgege jýyq ósimpul keshirildi.
Sonymen qatar, Shymkent qalasynyń turǵyny jer salyǵy boiynsha 1,4 mln teńge mólsherinde negizgi qaryz somasyn tólegen, osylaisha ol 209 809 teńge somasynda ósimpuldan bosatylǵan.
Múlik salyǵy boiynsha ósimpuldardy esepten shyǵarý reitingin Nur-Sultan qalasynyń turǵyny bastap tur. 260 myń teńgeden asqan ósimpuldan qutylý úshin ol 515 586 teńge negizgi qaryzdy tóledi.
MKK jyl sońyna deiin salyqtar boiynsha negizgi qaryzdy tólegen jaǵdaida ósimpuldy esepten shyǵarý boiynsha raqymshylyq qoldanylatynyn eske salady.
Salyqtyq raqymshylyq júrgizý merzimi 2020 jylǵy 31 jeltoqsanǵa deiin.
Ósimpuldy esepten shyǵarý úshin eshqaida barýdyń qajeti joq. Qaryzdyń negizgi somasyn tóleý jetkilikti. Ósimpul avtomatty túrde esepten shyǵarylady. Memlekettik kirister organdarynyń barlyq aýmaqtyq bólimshelerinde ósimpuldardy esepten shyǵarý jónindegi komissiialar quryldy.
Salyqtar boiynsha bereshektiń bar/joq ekendigi týraly málimetterdi QR QM Memlekettik kirister komitetiniń saitynda, sondai-aq eSalyq mobile (AppStore, PlayMarket) mobildi qosymshasy arqyly tekserýge bolady.
