Foto: Pexels.com
Qazaqstan Respýblikasynyń Tótenshe jaǵdailar ministri Shyńǵys Árinovtyń aitýynsha, órttiń shyǵýy men adam óliminiń negizgi sebebi jylý júieleriniń durys jumys istemeýi jáne turmystyq gazdy durys paidalanbaýy, dep habarlaidy Ult.kz.
Shyńǵys Árinov jeke turǵyn úi sektory ministrliktiń baqylaýyna jatpaitynyn aitady.
"Tek aýla aralaý kezinde usynystarmen ǵana shekteletinimizdi atap ótkim keledi. Oǵan qosa, kóp jaǵdaida halyq úilerine bas suqtyrmai, keńes alýdan bas tartady. Soǵan qaramastan, azamattardy órt qaýipsizdigi sharalary týraly SMS-habarlamalar, úiler men múlik ieleriniń birlestikteriniń chattary arqyly habardar etip otyramyz", – deidi ministr.
Ministr statistika málimetterin usynyp, óliminiń negizgi sebepterine jylytý júieleriniń isten shyǵýyn jatqyzdy.
"Atap aitqanda, peshterge qatysty, ol negizinen halyqtyń áleýmettik osal sanatyndaǵy úilerge tiesili. Kóbinese osy sanatta balalardy eresekterdiń qaraýynsyz qaldyrý sebebinen, balalar ólimi oryn alady. Osyndai oqiǵanyń biri, Jetiqara qalasynda 11 qazanda boldy, órt saldarynan úide qaraýsyz qalǵan bes bala qaza tapty. Atalǵan faktilerdi eskere kele, áleýmettik osal toptardy Ministrlik óziniń erekshe baqylaýynda ustaýda", – deidi ol.
Foto: Úkimet
Búginde 100 myńnan astam úi esepte tur. Olardyń barlyǵyna ákimdiktermen jáne eriktilermen birlesip órt habarlaǵyshyn ornatý jáne múmkindiginshe jylytý júielerin jóndeý, tútin murjalaryn tazalaý túrinde ataýly kómek kórsetiledi.
"2021 jyldan bastap barlyǵy 107 myńnan astam datchikter ornatyldy, olar adamǵa ýly gazdan bolatyn qaýip týraly alǵashqy satylarda eskertýge múmkindik beredi. Órt datchikteriniń iske qosylǵan 55 jaǵdaiy tirkeldi, sonyń arqasynda 248 adamnyń ómiri aman qaldy", - dep qosty ol.
Ministr turmystyq gazdy durys paidalanbaý da órttiń taǵy bir sebebi dep atady.
"Qazir halyq zańdy buza otyryp, gaz ballondaryn avtojanarmai quiý stansalarynan toltyrady, al olardyń basym bóligi ýtilizatsiiaǵa jatady. Bizdiń esebimiz boiynsha 348 myń gazballon aýystyrýdy talap etedi", - deidi Shyńǵys Árinov.
Aitýynsha, osy oraida, ákimdikterdiń janyndaǵy turǵyn úi komissiialary turmystyq jáne kommýnaldyq tutynýshylardyń gaz tutyný júieleri men gaz jabdyqtaryn qaýipsiz paidalaný erejeleriniń saqtalýyna baqylaý jasaýdy kúsheitýi qajet.
Oljas Bektenov osy máselege jaýap retinde halyqtyń áleýmettik osal toptarynyń úilerin esepke alýdy jáne olarǵa gaz datchikterin tegin ornatýdy tapsyrdy.
Foto: Úkimet
Oljas Bektenov profilaktikalyq is-sharalardy sapaly iske asyrý jáne qaýipsizdik talaptarynyń saqtalýyn baqylaý qajettigine nazar aýdardy. Tótenshe jaǵdailar ministrligine gaz tehnikalyq inspektsiianyń ókilettigin kúsheitý jumystaryn júrgizý, al ákimdikterge ministrlikpen birlesip órt qaýipsizdigi ailyq sharasyn uiymdastyrý tapsyryldy. Halyqtyń áleýmettik osal toptaryna jatatyn otbasylarǵa erekshe nazar aýdarý kerektigin tapsyrdy.
"Birinshi kezekte, halyqtyń áleýmettik osal toptarynyń úilerin esepke alǵan jón. Olar erekshe baqylaý aimaǵynda bolýǵa tiis. Osyndai úilerdiń barlyǵyna gaz datchikterin tegin ornatý qajet. Alaida Jetisý, Aqmola, Aqtóbe oblystarynyń jáne Almaty qalasy ákimdikteriniń bul baǵyttaǵy jumystary mardymsyz ekenin atap ótkim keledi. 2%-dan 14%-ǵa deiin ǵana qamtylǵan. Atalǵan ákimdikter datchikter ornatý boiynsha jumysty kúsheitýi kerek", - dep tapsyrdy Oljas Bektenov.
Premer-ministr ákimdikterge gaz jabdyqtaryn qaýipsiz paidalaný talaptarynyń saqtalýyn baqylaý jumystaryn kúsheitýdi tapsyrdy. Odan ári paidalanýǵa jaramsyz turmystyq ballondardy qoldanystan shyǵarý jáne ýtilizatsiialaý máselesin sheshý qajettigin atap ótti.
"Qazirgi ýaqytta turmystyq jáne kommýnaldyq tutynýshylardyń gaz jabdyqtaryn qaýipsiz paidalaný talaptarynyń saqtalýyn baqylaý ákimdikterge júktelgen. Alaida jumys tiisti deńgeide uiymdastyrylmaǵan. Gaz toltyrý pýnktteriniń menshik ieleri arasynda ballondardyń sapasyn baqylaý, olardyń jaramdylyq merzimin tekserý týraly túsindirý jumysyn júrgizý qajet", — dedi Oljas Bektenov.
Ol Ónerkásip ministrligine múddeli memlekettik organdarmen birlesip, ballondar óndirisin uiymdastyrý boiynsha sharalar qabyldaýdy tapsyrdy.
Sondai-aq Premer-ministr Mádeniet jáne aqparat ministrligine jergilikti atqarýshy organdarmen birlesip buqaralyq aqparat quraldary men áleýmettik jelilerde profilaktikalyq materialdar taratý máselelerin pysyqtaýdy tapsyrdy.
