Almatydaǵy M.Áýezov atyndaǵy Qazaq memlekettik akademiialyq drama teatrynda memleket qairatkeri, UOS ardageri, kórnekti aqyn, balalar ádebietiniń negizin qalaýshy Muzafar Álimbaevty aqtyq saparǵa shyǵaryp salý rásimi ótti, dep habarlaidy QazAqparat tilshisi.
Qaraly jiynǵa qatysqan Almaty ákimi Baýyrjan Baibek Memleket basshysynyń kóńil aitý hatyn oqyp berdi.
«Keńestik kezeńde ol qazaq ádebietiniń alyptarymen qanattasa júrip, Otan igiligi jolynda jemisti eńbek etti. Kóptegen jyr jinaqtary men án mátinderiniń avtory atandy. Otyz jylǵa jýyq balalardyń súiikti «Baldyrǵan» jýrnalynyń redaktory bolyp, ana tilimizdiń damýyna jáne búldirshinderimizdiń durys tálim-tárbie alýyna laiyqty úles qosty. Muzafar Álimbaevtyń esimi men eńbegin halqymyz árdaiym jadynda saqtaidy dep senemin», - delingen Elbasynyń hatynda.
Almaty ákimi atap ótkendei, Muzafar Álimbaev bar ǵumyryn, shyǵarmashylyǵyn memleketke, Almatyǵa arnady. «Onyń artynda qalǵan jaqyndaryna jaqsylyq tileimin», - dedi ol.
Qazaqstan Jazýshylar odaǵy basqarmasynyń tóraǵasy Nurlan Orazalin marqumnyń qazaq ádebieti men mádenietine sińirgen eńbegi týraly tilge tiek etti.
«HH ǵasyrdan beri halqymen birge tynys alyp kele jatqan, sóz óneriniń asa kórnekti ókilderiniń biri, UOS ardager-jazýshylarynyń mańdaialdy kóshin bastaǵan Muzafar Álimbaev ómirden ótti. 95 jasqa kelgen Muzaǵań balalar ádebietiniń klassikalyq úlgisin jasaǵan qazaqtyń arǵy-bergide ótken júirik sózin bir adamdai bilgen sóz bilgiri, «Muzaǵań aitty» deitin júzdegen qanatty sóz iesi bolǵan. Ultymyzdyń abzal aqsaqaldarynyń biri ómirden ótip otyr. Qazaq halqynyń orny tolmas aýyr qaiǵysyna kóńil aitamyn», - dedi Nurlan Orazalin.
Qazaqtyń asa kórnekti aqyny, Qazaqstannyń Halyq jazýshysy, Abai atyndaǵy Memlekettik syilyqtyń iegeri Muzafar Álimbaev 95 jasqa qaraǵan shaǵynda ómirden ozdy.
Muzafar Álimbaev 1923 jyly 29 qazanda Pavlodar oblysy Sharbaqty aýdanyndaǵy Maraldy aýylynda dúniege kelgen. QazMÝ-di támamdaǵan. Tyrnaqaldy óleńi on bes jasynda Pavlodar oblystyq «Qyzyl tý» gazetinde jaryq kórgen. Soǵys jyldarynda respýblikalyq, oblystyq jáne maidandyq gazetterde basylyp turdy.
1948 jyly Armiiadan oralǵan soń, «Pioner» jýrnalynda poeziia bólimin basqarady. 1956-1958 jyldary «Qazaq ádebieti» gazetinde bólim meńgerýshisi, Bas redaktordyń orynbasary. 1958 jyly «Baldyrǵan» jýrnaly ashylǵan kúnnen 1986 jylǵa deiin jýrnaldyń Bas redaktory boldy.
Alǵashqy kitaby - «Qaraǵandy jyrlary» 1952 jyly basylyp shyqty. Sodan beri birneshe ondaǵan kitaby, birneshe dúrkin tańdamalylary, týysqan halyqtar tilinde kóptegen jinaǵy shyqty.
Júz seksen ánge óleń jazdy. 64 tól týma jáne aýdarma kitaptardyń avtory.
Shyǵarmalary 20 tilge aýdarylǵan. Sonyń ishinde orys tilinde 6 kitaby, túrikmen tilinde «Men - túrik meimany» (1963), qyrǵyz tilinde «Joldar. Oilar. Jyrlar» (1966) jinaqtary jaryq kórgen.
Kórkem aýdarma salasynda Saǵdidyń «Bostanyn» («Jánnat» degen atpen), Petefi men Toqtaǵuldyń, Apollinerdiń tańdamaly óleńder jinaqtaryn, Iu.Fýchiktiń «Dar aldyndaǵy sózin», Orbelianidiń «Ǵibratnamasyn» jáne Pýshkin, Lermontov, Maiakovskii, Ǵ.Toqai, M.Jálil, Firdoýsi, H.Álimjannyń óleń-jyrlaryn qazaq tiline aýdarǵan.
1982 jyly «Aspandaǵy ápke» jinaǵy úshin respýblikalyq Abai atyndaǵy Memlekettik syilyǵyna ie boldy.
QR eńbek sińirgen mádeniet qyzmetkeri (1978), Qazaqstannyń Halyq jazýshysy, Jambyl atyndaǵy Halyqaralyq syilyqtyń iegeri (1996). Qazaqstan Respýblikasynyń Ánurany avtorlarynyń biri.
Otan soǵysynyń birinshi jáne ekinshi dárejeli ordenderimen, Qazaq SSR Joǵarǵy Keńesiniń Qurmet gramotasymen, «Otan» ordenimen marapattalǵan.
