Foto: Tengrinews.kz/Turar Qazanǵapov
Ádilet ministri Qanat Mýsin qazaqstandyqtar Májilis depýtattarynyń keibirin tikelei daýys berý arqyly sailai alatynyn aitty, - dep habarlaidy Tengrinews.kz.
Sondai-aq, Prezident Joldaýyna sáikes elimizde depýtattardy sailaý júiesi ózgerip jatqanyn atap ótti.
"Eger qazir Májilis depýtattary partiialyq negizde sailanatyn bolsa, endi depýtattardyń 30 paiyzy tikelei qazaqstandyqtar sailaityn aýmaqtan, al 70 paiyzy partiialyq tizim boiynsha sailanatyn bolady", - dedi ol.
Mýsin búginde Senat depýtattaryn aýmaqtan halyq sailaitynyn, biraq zańda belgilengen kvotaǵa sáikes olardy tikelei halyq emes, máslihattar sailaitynyn basa aitty.
"Jańa ózgertýler Májiliske sailanýǵa múmkindik beredi, bul Parlamenttiń taǵy bir palatasy, aýmaqtyq sailaý okrýgterinen 29 depýtat tikelei halyqtyń sailaýy arqyly sailanady", - dedi ministr Ortalyq kommýnikatsiialar qyzmetinde ótken brifingte jýrnalisterdiń saýaldaryna jaýap berip.
Onyń aitýynsha, belgili bir aýmaqtan halyq sailaǵan depýtatty óz mindetteri men sailaý aldyndaǵy ýádelerin oryndamaǵan jaǵdaida sailaýshylar keri shaqyryp alýy múmkin, iaǵni depýtattyq mandatynan aiyrylýy múmkin.
"Senatty qurý tártibi de ózgerip jatyr. 15 depýtattyń ornyna 10 depýtatty Prezident taǵaiyndaidy, onyń beseýin óz qalaýy boiynsha, 5-in Qazaqstan halqy Assambleiasynyń usynysy boiynsha taǵaiyndaidy", - dep eske saldy ministr.
