Qazaqstan avtobiznes qaýymdastyǵy 2020 jylǵy qarashada Qazaqstanda 8 186 jeńil avtokólik pen jeńil kommertsiialyq tehnika satylǵanyn jariia etti, dep habarlaidy "Ult aqparat".
«Naryq 24 paiyzdyq ósimdi kórsetip otyr. Suranysy joǵary modelder bolmasa dillerler baǵany saqtap, ońtaily usynystardy kúshinde qaldyrý úshin tutynýshylarmen aldyn ala kelisim jasasady. Aldaǵy eki aptada boljam boiynsha kólik satý kórsetkishi ósýi kerek», - deidi Qazaqstan avtobiznes qaýymdastyǵynyń vitse-prezidenti Anar Maqasheva.
Qarasha aiynda jeńil avtokólikterdiń ishindegi suranysqa eń kóp ie markasy Hyundai bolyp shyqty. Almatydaǵy jańa Hyundai Trans Kazakhstan zaýytynyń ashylýynyń arqasynda dillerler 2 166 avtokólik satyp (ótken jyldyń qarashasyndaǵy kórsetkishten 30 paiyzǵa kóp), rekordqa jetti. Al «SaryarkaAvtoProm» kompaniiasynyń Chevrolet markaly kólikterinen qarashada 865 dana (ekinshi oryn) satylsa, Lada satylǵan 1 193 kóligimen úshinshi orynnan kóringen. Toyota markaly kólikten ótken aida 719 ǵana satyldy (-43%). Dese de japon kólikteri tórtinshi orynda tur. Odan keiingi markalardyń tiziminde Kia (506; +1%), Volkswagen (297; +313%), JAC (296; +107%), Nissan (274; +15%) Renault (223; -15%) jáne Ravon (151) ornalasqan.
Modelder turǵysynan Chevrolet Nexia birinshi orynnan kórindi. Satylǵan 8 myńnan asa kóliktiń 1 004 danasy osy kólik. Qazaqstandyqtar kóp satyp alǵan kólikterdiń ishinde odan keiingi oryndarda Hyundai Accent (982), Chevrolet Cobalt (619), Lada Granta (606), Hyundai Tucson (524), Hyundai Creta (369), Kia Rio (333), Toyota Camry (312), Lada 4x4 (296) jáne Volkswagen Polo (252) tur.
