Birinshi kredittik biýronyń FCBAnalytics taldaý ortalyǵy avtonesie naryǵyna arnalǵan aqparattyq taldaý jariialady, dep habarlaidy QazAqparat.
Qazaqstanda 2015 jyldan bastap jeńildikpen avtonesie berý baǵdarlamasy jumys isteitini belgili. 6 jylda Qazaqstannyń Damý banki baǵdaralamaǵa 82 mlrd teńge baǵyttaǵan. Biyl bul maqsatqa 20 mlrd teńge bólinip otyr.
«Qazaqstan damý bankiniń derekteri boiynsha 2015 jyldyń kókteminen bastap 2021 jyldyń sáýir aiynyń sońyna deiin jalpy somasy 139,6 mlrd teńgege 27,5 myńǵa jýyq kredit berilgen. Bul osy ýaqyt aralyǵynda berilgen avtonesielerdiń jalpy sanynyń 10,2% jáne jalpy somasynyń 12,9% quraidy», - dep jazylǵan aqparattyq-taldamada.
FCBAnalytics málimetine sensek, Qazaqstanda avtonesiege degen suranys ósip keledi. 2021 jylǵy qańtar-sáýir aralyǵynda berilgen qaryzdar sany ótken jyldyń uqsas kezeńimen salystyrǵanda 24,3% joǵary bolǵan. 4 aida jalpy somasy 132,7 mlrd teńgege 27 588 avtonesie berilgen.
«Bul, óz kezeginde, portfeldiń ósýine alyp keldi. Qazaqstandyqtar qolda bar nesielerdi ótegennen góri jańa avtonesie alýǵa qumar. Avtonesieleý portfeliniń jalpy kólemi 12 aida 36,5% artyp, 818,1 mlrd teńgege jetti. Eń joǵary ósý qarqyny – ońtústik óńirlerde, eń tómeni-respýblikanyń batysynda», -deidi FCBAnalytics sarapshylary.
Avtonesiege degen suranyspen birge merzimi ótken boryshtyń sany da qatar ósip otyr. 2021 jylǵy 1 mamyrdaǵy jaǵdai boiynsha, merzimi ótken qaryzdar kólemi 74,2 mlrd teńgege (9,1%), onyń ishinde 90 jáne odan da kóp kún merzimi ótken qaryzdar – 44,1 mlrd teńgege (5,4%) jetken.
FCBAnalytics atldaýynda aitylǵandai, bankter úshin avtonesie áli de bolsa asa tabysty ónim bolyp sanalmai otyr. Osynyń saldarynan eldegi avtopark aitarlyqtai eski kúiinde qalyp otyr.
Ulttyq statistika biýrosynyń derekteri boiynsha, respýblikada tirkelgen jeńil avtomobilderdiń 64,3%-yna 10 jyldan asqan.
«4 aidyń qorytyndysy boiynsha elde shyǵarylǵan jeńil avtomobilderdiń kólemi 8,5% ósti. Degenmen, Qazaqstan dástúrli túrde avtomobilderdiń taza netto-importtaýshysy bolyp otyr. 2021 jyldyń I toqsanynyń qorytyndysy boiynsha kólik eksportynan túsken árbir dollarǵa importqa jumsalǵan 18 dollar kelgen», - dep jazylǵan taldaýda.
