2020 jyldyń birinshi toqsanynda árbir qazaqstandyqqa ortasha eseppen 21 keli etten ainalǵan. Bul – 2019 jyldyń uqsas kezeńimen salystyrǵanda 1,5 kelige artyq, dep habarlaidy "Ult aqparat".
Qazaqstannyń respýblikalyq angýs palatasy sharýalardyń eldegi etke degen suranysty qanaǵattandyrýǵa daiyn ekenin habarlaidy. Palata usynyp otyrǵan statistikaǵa súiensek, Qazaqstanda 2020 jyldyń qańtar men mamyr ailarynda 681,2 myń tonna qoi men qus eti satylǵan. Bul – 2019 jyldyń uqsas kezeńimen salystyrǵanda 21,3 myń tonnaǵa artyq. Agrarshylar karantin ýaqytynda da, TJ kezinde de eldiń azyq-túlik qaýipsizdigin qamtamasyz etý úshin bir sátke jumysty toqtatqan emes.
«Et jáne et ónimderi - qazaqstandyqtardyń azyq-túlik qorjynyndaǵy mańyzdy ingredientterdiń biri. Eń tómengi azyq-túlik sebet qunynyń 35%-y et pen balyqqa jumsalady. Qazaqstandyq fermerler ishki suranysty tolyǵymen qanaǵattandyryp qana qoimai, sonymen qatar eksporttyq naryqqa da shyǵýǵa daiyn. Salanyń eksporttyq áleýetin halyqaralyq sarapshylar moiyndap otyr: Dúniejúzilik bank mal sharýashylyǵyn turaqty damytý baǵdarlamasyn básekege qabiletti siyr etin óndirýdi qoldaý úshin Qazaqstanda júzege asyrǵaly otyr», - delingen habarlamada.
Qazaqstannyń respýblikalyq angýs palatasynyń direktory Dáýren Salyqovtyń aitýynsha, Dúniejúzilik banktiń bul baǵdarlamasy et óndirisin arttyryp qana qoimai, halyqty jumyspen qamtýda úlken ról atqarady.
«Qazaqstandaǵy mal sharýashylyǵy turaqty ekonomikalyq ósimge yqpal etedi. Búginde elimizde 20 myń otbasylyq sharýashylyq bar. Iri bordaqylaý alańdarymen yntymaqtastyq arqyly Aýyl sharýashylyǵy ministrligi 10 jyl ishinde onyń sanyn 100 myńǵa deiin arttyrýǵa nietti. Mal sharýashylyǵymen ainalysatyndar sany da 100-den 600 myńǵa deiin ósýi kerek», - deidi palata basshysy.
Palatanyń málimetinshe, siyr etiniń óndirisi jylyna eki ese – 1 mln 100 myń tonnaǵa deiin artýy kerek. Al eksport jyl saiyn 2,4 mlrd AQSh dollaryn ákelýi tiis.
