2020 jyldyń birinshi toqsanynda Qazaqstanda 18 836 avtokólik qurastyryldy, dep habarlaidy "Ult aqparat".
«QazAvtoÓnerkásip» Qazaqstannyń avtomobil salasy kásiporyndary odaǵynyń málimetinshe, osy jyldyń úsh aiynda jalpy somasy 139,5 mlrd teńgeni quraityn 18 836 avtokólik shyǵaryldy. Naqty mánde shyǵarylǵan kólik quraldarynyń jalpy kólemi ótken jylǵy kórsetkishten 2,1 esege asyp otyr.
Atap aitqanda, jeńil avtomobil óndirisi eki ese ósip, 16 651 kólik qurastyryldy. Avtobýs shyǵarý da 82,6 paiyzǵa artyp, úsh aida 272 birligi jolǵa shyqty. Al júk kólikterin qurastyrý 8,1 ese artyp otyr. Atalǵan kezeńde 1 663 júk kóligi qurastyrylǵan. 2020 jyldyń naýryzynda qazaqstandyq kásiporyndardyń konveierinen 6 229 avtokólik shyqty. Bul, 2019 jylǵy kórsetkishten 2,2 ese kóp.
Jyl basynan beri otandyq avtozaýyttar 11 593 kólik quralyn satty. Al respýblika turǵyndary jergilikti óndiristen shyqqan kólikterdi satyp alýǵa 83,6 mlrd teńge aqshalaryn jumsaǵan. Bul, bir jyl burynǵy kórsetkishten 70,3 paiyzǵa artyq.
Qazaqstandyqtardyń arasynda osy jyldyń birinshi toqsanynda suranysqa ie bolǵan kólikter mynalar: Lada (3 513 birlik.), Hyundai (3 094), KIA (1 924), Ravon (1 354) jáne JAC (179).
Munan bólek, otandyq kásiporyndar usynatyn kólik markalarynyń qataryna Skoda (133 birlik) Chevrolet (119) jáne UAZ (68) kiredi. Esepti kezeńde Lada Granta (1 628 birlik), Ravon Nexia R3 (1 354), KIA Rio (1 205), Hyundai Tucson (1 081) jáne Lada Vesta (937) kólikteri kóp satylǵan.
Hyundai Creta (683 birlik), Hyundai Accent (560), Lada Largus (510), KIA Sportage (422) jáne Hyundai Elantra (419 ) kólikterine de suranys joǵary.
