Eńbek kelisimsharttaryn tirkeýdiń biryńǵai júiesin engizýdiń arqasynda qazaqstandyqtar eńbek kitapshasynan qutylatyn bolady.
Bul týraly búgin Úkimettiń selektorlyq rejimdegi otyrysynda elimizdiń Eńbek jáne halyqty áleýmettik qorǵaý ministri Tamara Dúisenova málim etti, dep habarlaidy QazAqparat.
«Biryńǵai elektrondy eńbek birjasy bazasynda jumysshy profilin júrgizý jáne eńbek kelisimsharttaryn esepke alý júiesi qurylatyn bolady. Eńbek kelisimsharttaryn elektrondy formatqa kóshirý qaǵaz eńbek kitapshasyn alyp tastaýǵa múmkindik beredi», - dedi ol.
Ministrdiń atap ótýinshe, atalǵan júie arqyly azamattyń resmi jumysy týraly aqparat alýǵa bolady. Onda kelisimshart jasalǵan data shyǵyp turady. Aita keterligi, bul joba ázirshe elimizdiń bir oblysynda ilki joba retinde ǵana iske qosylmaq. Munan bólek, múgedektikti anyqtaý ótinimin berýdiń onlain júiesin engizý de josparlanǵan.
«Múgedekti anyqtaýǵa arnalǵan ótinim elektrondy túrde egov.kz elektrondy úkimet portaly arqyly túsedi. Atalǵan júie ótinim berýshiniń kelip qatysýyn kózdemeidi. Iaǵni, ótinim sarapshylar arasynda bólinedi. Al sarapshy dárigerler kimniń isin qarap jatqandyqtaryn da bilmeitin bolady», - dedi Tamara Dúisenova.
