Foto: azattyq-ruhy.kz
Belarýstik tresh-strimer Andrei Býrim (Melstroi degen atpen tanymal) uiymdastyrǵan páter utysyna bailanysty qazaqstandyqtar aqylǵa syimaityn áreketter jasap jatyr, dep habarlaidy Ult.kz .Másele Melstroidyń «jomarttyǵy» nemese «jazylýshylaryn qýantqysy keletininde» emes, onlain-kazinony jarnamalaýdyń klassikalyq ádisi bolýy múmkin. Sebebi onyń MellstroyGame heshtegimen jariialanǵan aýqymdy TikTok-chellendji onlain-kazinonyń ashylýyna orai ótkizilip jatyr.
Jaqynda Astanada er adam tek ish kiimmen MEGA Silk Way saýda ortalyǵynda júgirip, «Melstroi geim, maǵan páter syila!» dep aiqailap, baiqaý ataýy jazylǵan plakatty bulǵap júrgen. Politsiia dereý áreket etip, 26 jastaǵy azamatty ustady. Ol usaq buzaqylyq baby boiynsha 15 táýlikke qamaldy.
Taǵy bir oqiǵada Seifýlla Serikuly esimdi qazaqstandyq resmi túrde esimin Mellstroygame Serikuly dep ózgertken. Ol mundai qadamǵa páter utysyna qatysý úshin barǵanyn aitqan. Esimin ózgertý protsesin ol HQKO-da videoǵa túsirip, jariialady.
Foto: stan.kz
Melstroi baiqaýdy qazan aiynyń ortasynda bastaǵan. Shart boiynsha, qatysýshylar MellstroyGame tegin jáne onyń onlain-kazinosyn atap ótetin shyǵarmashylyq video jariialaýy kerek. Kún saiyn blogerdiń komandasy eń erekshe jáne haipqa toly videony tańdap otyrady. Bas júlde — álem boiynsha qatysýshylar arasynda oinatylatyn 30 páterdiń biri.
Aita keteiik, Qazaqstanda qumar oiyndary problemasy óte ózekti. 2025 jyldyń birinshi toqsanynda otandastarymyz qumar oiyndarǵa 310 milliard teńgeden astam qarajat jumsaǵan. Qazir qumar oiyndary jyljymaityn múlik naryǵyn basyp ozyp, aldyńǵy orynǵa shyqqan. Bul máseleni Qazaqstan Prezidenti de birneshe ret kóterip, naqty tapsyrma berdi. Qaýipsizdik keńesiniń otyrysynda da, Ulttyq Quryltaida qordalanǵan máselege erekshe toqtalǵan bolatyn.
Oqi otyryńyz: Onlain-kazino jarnamalaǵan blogerlerge qylmystyq jaýapkershilik qarastyrylýda
Májilis depýtaty Elnur Beisenbaev elimizde 400 myńdai adam býkmeker men kazinolardyń turaqty klientine ainalǵanyn aityp dabyl qaqqan.
«Qumar oiynnyń bylaisha etek alyp ketýine onyń eshbir tejeýsiz jarnamalanýy da áser etip otyr. Býkmekerlik keńseler jarnamaǵa qomaqty qarajat jumsaýda. Telearnalar, resmi internet saittar, Youtube arnalary, Tik-tok, Instagram, Telegram siiaqty áleýmettik jelilerde býkmekerlik keńselerdiń jarnamasy tolyp júr. Sonymen qatar keibir qoǵamdyq pikir kóshbasshylary, belgili blogerler, media juldyzdar da osy ziiandy qubylysty jarnamalap júr. Usynylyp otyrǵan zańda qumar oiyndy jarnamalaýǵa da tyiym qarastyrylǵan. Endi osy zań jobasyn taǵy da jan-jaqty pysyqtap, tez arada qabyldaýymyz kerek. Muny Prezident Atyraýda ótken Ulttyq Quryltaida «Parlamentte qaralyp jatqan sol jobany osy sessiianyń sońyna deiin qabyldaý qajet» dep naqty tapsyrǵanyn bilesizder», - degen bolatyn Beisenbaev Májiliste oiyn biznesin retteý, lýdomaniiamen kúres boiynsha zań jobasynyń tanystyrylymynda.
Eske salaiyq, qumar oiyndar — jeńil tabysqa jetýdiń joly emes, táýeldilikke aparar qaýip. Kazino men onlain-stavkalar adamdy qarjylyq kúizeliske, otbasy men dostardan alystaýǵa, psihologiialyq problemalarǵa uryndyrady. Qumar oiynnan aýlaq bolyńyz!
