Qazaqstandyqtar bir kúnde eń kemi 2,2-2,5 dollar jumsaidy. Ulttyq banktiń qazirgi baǵamy boiynsha bul soma 928-1055 teńge shamasynda, dep habarlaidy QazAqparat.
«Eń kedei elder óz halqy úshin keminde kúnine 1 dollarǵa ómir súrýdi qamtamasyz etýge tyrysady, damýshy elder – kúnine 1,9 dollar, odan keiin – kúnine 2,5 dollarǵa umtylady, damyǵan memleketterde kúnine 5,5 dollar jumsalady. Biz damýshy elmiz, sondyqtan ekonomikalyq jaǵdai bizge satyp alý qabiletiniń pariteti boiynsha kúnine 2,2-2,5 dollar jumsaýǵa múmkindik beredi. Bul halyqaralyq standart normalaryna sáikes keledi», - dedi QR Eńbek jáne halyqty áleýmettik qorǵaý ministrligi Áleýmettik kómek departamentiniń direktory Asqar Niiazov Ortalyq kommýnikatsiialar qyzmetinde.
Onyń aitýynsha, 2020 jyly ataýly áleýmettik kómek alǵan 47 myń otbasy, al 2021 jyly 51 myń otbasy kedeilik jaǵdaiynan shyqqan. 2020 jyly jalpy somasy 65,6 mlrd teńgege AÁK tólengen. Bul rette respýblikalyq biýdjetten 57,5 mlrd teńge, jergilikti biýdjetten 8,1 mlrd teńge qarastyrylǵan. 1 mamyrdaǵy jaǵdai boiynsha AÁK 111,4 myń otbasy nemese 571,1 myń adam aldy.
Sondai-aq Niiazov Qazaqstandaǵy kedeilik shegi eldiń ekonomikalyq múmkindikteri boiynsha bekitiletinin túsindirdi. Ol belsendiliktiń áleýetin tómendetýge emes, arttyrýǵa múmkindik beretin shekte bekitilgen.
«2019 jyly járdemaqy mólsheri ósken kezde sátsiz tájiribeni bastan ótkerdik. Saldarynan adamdar járdemaqy alý úshin tabystaryn jasyra bastady, jumystan shyqty, ajyrasty. Iaǵni AÁK alý úshin jalǵan ajyrasýdy kórsetkileri keldi . Mundai faktiler kóp boldy. AÁK deńgeii ómir súrýge qolaily jáne áleýetti arttyrýǵa yqpal etýi tiis. Sondyqtan bul kómekti shartty jáne shartsyz túrge bólýge týra keldi. Shart boiynsha – biz memleket retinde adamdy jumysqa ornalastyrý jóninde mindetteme alamyz, eger ol bas tartsa, kedeilikten shyǵýǵa múddeli bolmasa, úide otyrǵysy kelse jáne tek járdemaqy alatyn bolsa, mundai adamǵa AÁK taǵaiyndalmaidy», - dedi Asqar Niiazov.
