Grýziianyń Batými qalasyndaǵy qymbat qonaq úiden shuǵyl túrde shyǵarylyp jatqan týristerdiń qatarynda qazaqstandyqtar da bar bolyp shyqty, dep habarlaidy "Ult aqparat" 24.kz arnasyna silteme jasap.
Sot qaýlysyna bailanysty 300-ge tarta demalýshy búginge deiin tólenip qoiǵan nómirlerin tastap shyǵýǵa májbúr bolyp otyr. Otelde órt qaýipsizdigi erejeleri saqtalmaǵan. Tótenshe jaǵdailar qyzmetkerleri munyń sońy ótken jyly tirkelgen qaiǵyly oqiǵaǵa uqsas jaǵdaiǵa ákelip soqtyrýy múmkin dep eskertýde. Ol kezde órt saldarynan 11 adam mert bolǵan edi.
Sot qaýlysyna sáikes oteldiń jumysy belgili bir merzimge deiin toqtatylǵan. Qonaq úige turaqtaǵandar men qyzmet kórsetýshi personal júkterin jinaýda.
«Ne bolyp jatqany túsiniksiz. Qonaq úiden nege ketýimiz kerek? Biz bes kúnge nómir jaldap qoiǵan edik. Nelikten bizdi shyǵaryp jibergenin túsingen joqpyz. Aitýlarynsha, bári de qaýipsizdigimiz úshin jasalyp jatqan kórinedi. Bizdi qaida aparyp ornalastyratyndary belgisiz. Qalai bolǵanda da, osy keshke deiin qonaq úidi bosatý kerektigimiz aityldy», - deidi otelde ornalasqandardyń biri.
Sarapshylardyń qorytyndysyna sáikes, oteldiń jabylýynyń basty sebebi - tútindi alastaý júiesiniń bolmaýy. Mine, sondyqtan, órt týyndaǵan jaǵdaida otelge turaqtaǵandardyń ómirine qaýip tóneri anyq. Byltyr 24 qarashada osy másele eskerilmegendikten, qaiǵyly jaǵdai tirkelgen.
«Biz qonaq úi ielerimen shuǵyl jumysty bastadyq. Máseleni sheshýge barynsha daiyn ekenimizdi bildirip otyrmyz: belgili bir merzim men qajetti aqyl-keńes beremiz. Demalýshylar men personaldyń ómirine tónip turǵan qaýiptiń mólsheri bir paiyz bolsa da, qonaq úi jumysyn jalǵastyra almaidy», - deidi TJ boiynsha qyzmettiń ókili Maisýradze.
Qonaq úidiń ákimshiligi sot sheshimi týraly shilde aiynan beri habardar bolyp shyqty. Alaida menedjerler klientterdi qabyldaýdy toqtatpaǵan. Týyndaǵan máselege Týrizm departamenti de aralasqan. Atalmysh departamenttiń qyzmetkerleri demalýshylardy basqa qonaq úilerge ornalastyrý úshin barlyq jaǵdaidy jasap jatyr. Olardyń aitýynsha, qolǵa alynǵan sharalardyń barlyǵy demalýshylardyń qamy úshin jasalyp jatqandyqtan, tirkelgen jaǵdai eldiń týristik imidjine eshqandai áserin tigizbeidi.
