2020 jyldyń 1 qańtarynan bastap, qazaqstandyqtar jeke múlki men kirisi týraly jylyna bir ret esep berýge mindetteledi, dep habarlaidy QazAqparat tilshisi.
Bul týraly QR Qarjy ministrligi Memlekettik kirister komiteti tóraǵasynyń orynbasary Mádi Tákiev Úkimet úiinde ótken baspasóz máslihatynda eske saldy.
Onyń aitýynsha, deklaratsiiada jeke tulǵa menshik quqyǵy bar múlikterdi, onyń ishinde páterler, kólikter, banktegi salymdaryn jáne 2019 jyldyń 31 jeltoqsany jaǵdaiynda tóleýge alǵan mindettemelerin kórsetýi tiis.
Sonymen birge, komitet ókili deklaratsiia toltyrýy qajet tulǵalardy úsh topqa bólip kórsetti.
1. Kámelettik jasqa tolǵan Qazaqstannyń barlyq azamattary, onyń ishinde oralmandar men Qazaqstanda turýǵa yqtiiarhat alǵandar.
2. Múlki nemese qatysý úlesi bar kámelettik jasqa tolmaǵandar.
3. QR aýmaǵynda múlki bar sheteldikter.
«Deklaratsiiada úide saqtaýly turǵan qolma-qol qarajatty da kórsetý kerek. Eger qolma-qol aqsha kólemi eń tómengi jalaqy kóleminiń 500 esesinen asyp ketse (Eńbekaqynyń eń tómengi mólsheri - 28 284 teńge), bankte esepshot ashyp, qarajatty sonda saqtaýyńyz kerek. Sosyn bankte osyndai qarajatyńyz bar ekenin kórsetesiz», - dep túsindirdi Mádi Tákiev.
Kámelettik jasqa tolmaǵan, biraq tirkeýde turǵan múlki bar tulǵalar úshin deklaratsiiany ata-anasy nemese qamqorshysy jeke sáikestik nómir arqyly toltyrady.
Aldyn ala boljam boiynsha, 2020 jyly Qazaqstanda shamamen 12 mln 900 myń adam deklaratsiia toltyratyn bolady. Onyń ishinde 7,4 mln adam - qala turǵyndary jáne 5,5 adam - aýyl turǵyndary bolady dep kútilýde.
Deklaratsiiany toltyrýdyń eki merzimi bekitilgen: qaǵaz júzinde esep bergisi kelgender 15 shildege deiin, al elektrondy túrde deklaratsiia toltyratyndarǵa - 15 qyrkúiekke deiin ýaqyt beriledi.
