Qazaqstanda 2020 jylmen salystyrǵanda azyq-túlik ónimderin tutyný kórsetkishi azaiǵan, dep habarlaidy QazAqparat.
Ulttyq statistika biýrosynyń dereginshe, 2020 jylmen salystyrǵanda byltyr qant jáne konditer ónimderinen basqa azyq-túlik ónimderiniń negizgi toptary boiynsha tutyný kórsetkishi tómendegen.
«Mańyzy bar azyq-túlik ónimderi toptarynyń ishinde tutyný kórsetkishi sút jáne sút ónimderine - 6,3%, nan jáne jarma ónimderine - 4,7%, et jáne et ónimderine 1,7% tómendedi. Byltyr bir aida ortasha eseppen halyqtyń jan basyna shaqqandaǵy azyq-túlik ónimderiniń jekelegen túrleri boiynsha tutynýy: kartop – 3,9 kg, birinshi suryptaǵy bidai unynan pisirilgen nan – 2,8 kg, siyr eti – 2 kg, alma - 1,6 kg, kúrish, qumsheker – 1,3 kg, shiki sút, airan – 1,3 l, jumyrtqa – 16,2 dana, makaron – 0,9 kg, jańa aýlanǵan nemese salqyndatylǵan balyq – 0,8 kg, qara shai – 0,1 kg», - dep jazdy vedomstvodan.
Qala men aýyl halqynyń azyq-túlik ónimderiniń negizgi toptaryn tutyný kórsetkishin salystyrǵanda, eń joǵary aiyrmashylyq jumyrtqa, nan jáne jarma ónimderi, sondai-aq jemisterdi tutynýda baiqalady.
«Azyq-túlik ónimderin tutyný derekteri turmys deńgeiine qarai 12 000 úi sharýashylyǵyn iriktep zertteý nátijelerimen esepteldi». – delingen habarlamada.
