Elektrondyq úkimet portalynda pilottyq rejimde jańa servis iske qosyldy. Endi qazaqstandyqtar avtokólikterin onlain túrde tirkei alady, dep habarlaidy "Ult aqparat" «Azamattarǵa arnalǵan úkimet» memlekettik korporatsiiasyna silteme jasap.
Eger azamattyń elektrondyq-tsifrlyq qoltańbasy bolsa, onda Mamandandyrylǵan halyqqa qyzmet kórsetý ortalyǵyna nemese IIM-niń tirkeý-emtihan bólimshelerine barmai-aq, avtokólikterin elektrondyq úkimet portalynda rásimdei alady.
«Vedomstvoaralyq komissiia aiasynda biz memlekettik qyzmetterdi ońtailandyrý jumystaryn júrgizýdemiz. Avtokólikterdi tirkeý qyzmetine degen suranys qarqyndy túrde ósip kele jatqandyqtan, biz bul qyzmetti elektrondyq nusqaǵa aýystyrý týraly usynys jasadyq. Bul jańashyldyq qyzmet alýshylardyń ýaqytyn únemdep qana qoimai, mamandandyrylǵan HQO-daǵy júktemeni azaitýǵa múmkindik beredi. Máselen, bizdiń korporatsiia arqyly biylǵy bes aida avtokólikti tirkeý jáne qaita tirkeý boiynsha 745 592 qyzmet kórsetilgen», - dedi «Azamattarǵa arnalǵan úkimet» basqarmasynyń tóraǵasy Abylaihan Ospanov.
Memlekettik korporatsiianyń baspasóz qyzmetinen habarlaǵandai, portal arqyly ótinim bergende, eshqandai qujattyń skan-nusqasyn usynýdyń qajeti joq. Óitkeni qajetti málimetterdiń barlyǵy aqparattyq júieler arqyly alynady.
«Buǵan deiin kólikti satýshy men satyp alýshy ótinim berý úshin bir ýaqytta «Azamattarǵa arnalǵan úkimettiń» front-ofisine baryp, qajetti qujattardy tapsyrýy tiis edi. Endi azamattar ótinimdi úiden shyqpai-aq, onlain tártipte joldai alady. Elektrondyq úkimet portaly arqyly biz aldaǵy ýaqytta taǵy da birqatar memlekettik qyzmetterdi alý protsesin jeńildetpekpiz», - deidi «Ulttyq aqparattyq tehnologiialar» AQ basqarma tóraǵasy Áset Turysov.
Qyzmetti onlain alý úshin egov.kz portalynda tirkeýden ótip, satylatyn kólik jaily aqparatty engizip, aiyppuldar men salyq tólemderin, tehnikalyq jaǵdaiyn tekserýge suranys joldaý kerek. Eger tólenbegen qaryz bolsa, elektrondyq portal arqyly tóleýge bolady. Odan keiin avtokólikti satyp alýshy azamat elektrondyq úkimet portalyndaǵy jeke kabineti arqyly satýshy qaldyrǵan ótinimmen tanysyp, aiyppuldardy teksergennen keiin nómir belgisine, kólik quralyn tirkeýge jáne tirkeý týraly kýálikke tólem jasai alady. Satyp alýshy óziniń elektrondy-tsifrlyq qoltańbasymen smart-kelisimdi rastaǵan soń mamandandyrylǵan HQO-ǵa nómir belgisin alyp ketý úshin ǵana keledi. Sondai-aq nómirdi úige jetkizý qyzmetine de tapsyrys berýge bolady.
Eske sala ketsek, 2018 jyldyń mamyr aiynan bastap QR Ishki ister ministrligi avtokólikti tirkeý kezindegi salystyrýdy alyp tastaǵan bolatyn. Endi esepten shyǵarý nemese kólikti tirkeý kezinde nómirlik agregatty teksertýdiń qajeti joq. Mundai talap tek kólikti alǵash ret tirkegende qoiylady.
Sondai-aq júrgizýshi kýáliginiń merzimi ótkenge deiin aýystyrý nemese joǵaltyp alý jaǵdaiynda meditsinalyq tekseristen ótýdiń jáne psihiatr, narkologtan anyqtama ákelýdiń qajeti joq. Al azamattyń elektrondyq-tsifrlyq qoltańbasy bolsa, júrgizýshi kýáligin elektrondyq úkimet portaly arqyly onlain tártipte aýystyrýǵa bolady.
