Búgin Nur-Sultannan bastap elimizdegi barlyq ákimshilik ǵimaratta memlekettik tý tómen túsiriledi, dep habarlaidy Sputnik Qazaqstan.
Búgin tutas Qazaqstan aza tutady. Mektep pen balabaqshada josparlaǵan barlyq merekelik shara keiinge shegerilip, telearnalardaǵy oiyn-saýyq baǵdarlamalary bir kúnge toqtatylady.
Almaty qalasynyń ákimdigi 28 jeltoqsanda Jańa jylǵa orai uiymdastyrylatyn merekelik sharalar men korporativter ótpeitinin málimdedi.
"Qaiǵyly jaǵdaiǵa bailanysty QR prezidenti ákimshiliginen 27-28 jeltoqsan kúnderi ótetin korporativterdi ótkizbeý týraly aqparat keldi. 2019 jyldyń 28 jeltoqsanyn jalpyulttyq aza tutý kúni dep jariialady. Bul kúni qaladaǵy barlyq merekelik bezendirý men illiýminatsiialar óshiriledi", - deidi ákimdik qyzmetkerleri.
Sondai-aq zań boiynsha ulttyq aza tutý kúni aiaqtalǵansha elektrondy BAQ-ta jarnamaǵa tyiym salynady, máiittiń, qannyń sýretin jariialaýǵa bolmaidy.
Almaty mańyndaǵy ushaq apaty
Qaiǵyly oqiǵa 27 jeltoqsan tańǵy jetide Almaty túbinde boldy. Almaty áýejaiynan Nur-Sultanǵa ushyp shyqqan Bek Air áýe kompaniiasyna tiesili Fokker 100 ushaǵy kóp uzamai Talǵar aýdanyndaǵy eldi mekenge qulady. Ushaq bortynda 93 jolaýshy, 5 ekipaj múshesi bolǵan.
Qazaqstannyń Ishki ister ministrligi 12 adamnyń qaza bolǵanyn rastady. Kóz jumǵandar arasynda generaldar keńesiniń tóraǵasy Rústem Qaidarov pen respýblikalyq internet-portaldyń shyǵarýshy redaktory Dana Krýglova bar.
Memleket basshysy Qasym-Jomart Toqaev qaza bolǵandardyń jaqyndaryna kóńil aityp, kináli adamdar qatań jazalanatynyn jetkizdi. Prezident 28 jeltoqsandy jalpyulttyq aza tutý kúni retinde jariialady.
Meditsinalyq kómek qalai kórsetildi?
103 qyzmetine sýyq habar tańǵy saǵat 07:43-te túsken. Oqiǵa ornyna Almaty oblysyndaǵy jádel járdem qyzmetiniń 16 brigadasy – Talǵar aýdanynyń 5 brigadasy, Ile aýdanynyń 6 brigadasy, Boraldai aýylynyń 2 brigadasy, Eńbekshiqazaq aýdanynyń 3 brigadasy shuǵyl jetken. Jalpy, apattan zardap shekkenderge kómek kórsetýge Almaty qalasynyń jádel járdem qyzmetiniń 35 brigadasy jumyldyryldy. Sondai-aq apat ornyna eki neirohirýrgiialyq brigada bardy.
4 million teńgeden bólinedi
27 jeltoqsan kúni astanada Qazaqstan premer-ministri Asqar Maminniń tóraǵalyǵymen Bek Air áýe kompaniiasy ushaǵynyń qulaý sebepterin tergeý boiynsha úkimet komissiiasynyń otyrysy ótti. Jiynda premer-ministr ushaq apatynyń sebepterine tolyq tergeý júrgizýdi jáne qaza tapqandardyń otbasylaryna kómek kórsetýdi tapsyrdy.
Sondai-aq úkimet basshysy qaza tapqandardyń týǵan-týystary men jaqyndaryna kóńil aitty, al zardap shekkenderge tezirek saýyǵýdy tiledi.
"Memleket basshysynyń tapsyrmasymen ushaq apatynan qaza tapqandardyń otbasylaryna 4 million teńgeden qarajat bólinedi. Zardap shekkenderge qajetti qarjylai kómek kórsetiledi", - dedi premer-ministr.
Mamin apat sebepterin tergeý jónindegi úkimettik komissiia 2020 jyldyń 10 qańtaryna qarai óz jumysynyń aldyn ala qorytyndylaryn usynýy tiis ekenin atap ótti.
