Biyl qazaqstandyqtar «ádemi nómirler» úshin 2 mlrd teńge jumsaǵan. Bul týraly «Azamattarǵa arnalǵan úkimet» memlekettik korporatsiiasynyń ókili Murat Jumanbai málimdedi, dep habarlaidy Baq.kz aqparat agenttigi.
«Azamattarǵa arnalǵan úkimet» memlekettik korporatsiiasynyń mamandandyrylǵan HQKO jarty jylda jalpy somasy 1 913 267 539 teńgege 7775 memlekettik tirkeý nómir belgisin bergen. Bul soma 2017 jylǵy dál osy kezeńmen salystyrǵanda úsh ese kóp bolyp otyr. Byltyr alty aida Qazaqstan azamattary 1574 «ádemi» nómirge 587 406 055 teńge tólegen.
Murat Jumanbaidyń aitýynsha, mundai nómir belgileri kóbinese Astana (1762) jáne Almaty (3232) qalalarynda, sondai-aq Túrkistan (580), Jambyl (457) jáne Qostanai (376) oblystarynda berilgen.
